熊黛林Sharp出初夏光芒

短裙、短褲一向受女星歡迎，星級形象指導郭慶彬（Ricky Kwok）建議以船踭鞋配襯，令雙腿修長，但大腿粗的需要留意裙長。Ricky大讚陳嘉桓充滿青春氣息，熊黛林則形象鮮明，骨架線條靚。

熊黛林 閃爍夏日 9分

「呢條珠片晚裝裙有夏天感覺，顯得Lynn嘅鎖骨線條好靚、好Sharp，佢絕對駕馭到條裙，又騷到修長美腿。」

楊愛瑾 時尚有型 7分

「Miki今次有種好時尚嘅感覺，成個Look好青春，好啱佢年紀，條裙長度啱啱好，亦夠簡單，顯得對腳更加修長。」

高海寧 灰暗失色 4分

「呢隻灰色比較難着，佢皮膚偏黃，皮膚白啲嘅人會着得更好睇。頭髮放落嚟會靚啲，依家條頸乜都冇，感覺有啲成熟。」

陳嘉桓 青春甜美 8分

「陳嘉桓條裙顏色鮮艷令人印象深刻，襯托到骨架好瘦，雙腳修長，比以前更Glamourous，感覺好甜美、新潮。」

陳靜 老氣賣弄 3分

「條裙有啲Sell身材同埋太成熟，唔夠Elegant，DaDa咁後生可以着Young啲，黑色裙通常都唔會出問題，但呢條裙太性感。」

鍾嘉欣 簡單大方 7分

「佢個造型簡單舒服，顏色好襯佢膚色，好女孩子嘅感覺，對簡單嘅高踭鞋令成個Look大方得體，所有嘢都Tone on Tone。」

鍾舒漫 穩陣啱身 6分

「今次Sherman好女仔，同以前感覺幾唔同，條裙嘅剪裁好Fit，屬穩陣選擇，不過不失，小腿望落去好順眼，對裸色高踭鞋都襯得幾好！」

呂慧儀 優雅顯瘦 5分

「條黑色裙感覺唔錯，有優雅感覺，啱細骨架嘅人着，但係條裙有啲長，襯埋對Ankle Boots，望落去令佢對腳唔夠修長，襯高踭鞋會簡單啲﹗」

鄭融 累贅平凡 3分

「佢今次唔係好得，件上身衫唔夠起眼，佢嘅膚色襯鮮色衫會靚啲，條短褲一層層，有少少顯得個Hip肥同令對腳變粗。」

Profile

郭慶彬（Ricky Kwok）從事時裝界多年，常擔任廣告形象指導，曾為樂基兒及熊黛林等設計造型，亦開設時裝店打造潮人，近來忙於籌備相展。

（最高10分）