王羽腦中風入院

早前「獨臂刀」王羽獲陳可辛力邀出山參與電影《武俠》，上月還與甄子丹及湯唯等出席康城電影節，但昨日本報得悉王羽中風入院，他在電話中坦承腦中風，但情況不嚴重，現已康復中。王羽上月底到珠海與友人飯敍，期間暈倒送院，女兒王馨平非常擔心，翌日即接他返港作詳細檢查：「只係輕微腦中風，個腦有血塊壓住。（傳你肺部黑晒，有癌症？）只係中風時令喉嚨肌肉收窄，有少少食物落唔到個胃，跌咗落肺度啫！咳番出嚟都冇事喇！」已在家中休養的他表示為求安心，今日將返台灣讓十多位醫生朋友再作一次更詳細檢查，兩位女兒亦會同行。至於是否康城之行太攰所致？王羽說：「太攰，要休息吓。（唔接戲住？）唔得呀！等好番先。（戲癮起？）要睇導演囉！如果陳可辛就拍。」王馨平昨日在電話中說：「我爸爸的確之前入咗醫院，係有輕微症狀，但已經出咗院，依家冇事，多謝大家關心！」而陳可辛昨日出發往上海電影節宣傳《武》片，吳君如則做跟得夫人隨行。