刀療治周身病痛　諸葛肉隨砧板任剁

名模諸葛梓岐認真膽生毛，因不斷工作而積勞成疾，身體虛弱，故到台灣工作時順道一試刀療的滋味。一刀刀劈在背上，真是名副其實的「肉隨砧板上任劈任剁」！

即將下嫁Neway太子爺薛嘉麟的名模諸葛梓岐，雖然快將成為豪門少奶，不過未有恃寵生驕，連月來仍然馬不停蹄四處公幹。由於未真正休息過，以致積勞成疾，工作時力不從心！諸葛直言早前曾推拿按背至玉背出現紫紅色，到台灣工作時更順道接受令人觸目驚心的刀療！

菜刀劈背男友心疼

諸葛指刀療當日，治療師先隔空摸她診症：「話我頭痛、血液循環差兼心口翳等，全部都講中，仲叫我唔好咁大壓力。佢初時用兩把刀嘅刀背劈落嚟，之後更用刀鋒！但我一啲都唔驚！因為聽過呢種療法有新陳代謝作用。成個療程要一個鐘，做完好舒服，仲鬆弛過做推拿！」工作捱出病來，問到男友有否感心疼？她笑說：「佢見到我身體咁差，都話好心疼叫我唔好做嘢，但我覺得女人要有自己事業先得！」

雖然身在外地，但亦不忘端午節的諸葛笑說：「有日行經賣糉檔攤，覺得好香，十五十六唔知食唔食好，檔口啲阿姐知我咁想食，送咗幾隻畀我！」