發哥獻計空運栢芝

鋒芝婚變熱爆全城，連影帝周潤發也密切關注！昨日在機場出現的發哥，得悉傳媒守候張栢芝，即獻計叫栢芝向楊受成借私人飛機赴吉隆坡；而據知栢芝拍完稍後開拍的《河東獅吼2》後，暫時不接工作，為兒子Lucas入讀K1作準備！

謝霆鋒和張栢芝的婚變風波成為全城熱話，就連周潤發亦十分留意。事實上，向來關心後輩的發哥，對霆鋒和栢芝讚賞有加，今年霆鋒榮登金像影帝時，發哥曾向他說：「香港電影未來三十年就靠你喇！」昨午十二時半，發哥偕同發嫂陳薈蓮抵機場，他表示是往北京宣傳英皇電影《建黨偉業》，他並八卦問記者等誰，當記者告之盛傳栢芝會赴吉隆坡找霆鋒箍煲，發哥即搞笑獻計：「吉隆坡？好近啫！三個幾鐘飛機，佢（栢芝）問楊受成（霆鋒老闆）借架私人飛機飛過去，使乜喺呢度等？你哋點等得到？」

難忘鄧氏爭產風波

發哥又謂最近娛樂圈變得熱鬧，他風趣地說：「多嘢做都好嘅，你哋做記者更有價值。記唔記得當年鄧氏（新馬仔鄧永祥）爭產風波，都熱鬧咗好耐。（咁好記性？）我家姐（周聰玲）做娛樂記者o架！梗係印象深刻。」

而身形弗爆的發哥精神奕奕，受訪時笑容滿面，他表示體重為一百六十多磅；此外，有日本旅客邀發哥簽名合照，而機場櫃位職員也與他拍照留念，發哥來者不拒，十分親民。

為Lucas入讀K1停工

另一邊廂，栢芝原定本月中到內地為馬偉豪新片《河東獅吼2》試造型，但投資該片之新亞娛樂公司余先生昨日接受訪問，他坦言試造型一事還未落實：「因為我哋都想栢芝可以靜吓，所以暫時仲未落實，再加上我哋搵咗張叔平做美指，大家都對佢好有信心，栢芝仲話阿叔（張叔平）做嘅嘢，乜都啱心水啦！依家都有可能七月頭直接開工。」

《河》片下月在內地開拍，預計拍攝兩個月。據知，栢芝拍完該片後，暫時不會再接電影工作，因為九月兒子Lucas要入讀K1，栢芝想陪伴他踏入成長另一階段。