法拉着錯「浴袍」變老土怪
「未食五月糉，寒衣不入槓」，不少女星早以夏日Look示人，圖案色彩奪目，但太多的話隨時令人眼花，而陳法拉的打扮更是「着錯晒」！
陳法拉4分
張：成套衫唔知點解好似浴袍，唔靚之餘毫無時代感！法拉個髮型未免太隨便，感覺老土。佢適合着啲有時代感嘅服裝，睇落後生啲。
胡杏兒3分
張：套衫未免太過普通，顏色唔靚之餘感覺仲好「街邊貨」，令杏兒睇落好似「街坊」，仲令人覺得佢下身好重，顯得腳好短。
莊思敏5分
張：佢夠高大着衫多數冇乜大問題，今次套衫好穩陣，望落唔夠驚喜，而且全身圖案太多，尤其頂帽同條褲嘅圖案太撞，視覺上唔協調。
熊黛林5分
張：一套好正常嘅行街裝束，冇驚喜亦唔嚇人。好彩佢夠高，行出街一睇就知佢係星，如果套衫着喺第二個度一定冇人會認得出。
鄭融6分
張：佢身形比較嬌滴滴，着衫會比較多限制。不過，向來都覺得佢着衫好有個性，今次都唔錯，身形合比例之餘，睇落身材都好均勻。
諸葛梓岐5分
張：我向來覺得佢着衫唔係好啱佢年紀，呢套都一樣太成熟，一身珠片第一眼令我諗起仙杜拉登台着嘅衫，對鞋亦同Cyber嘅上身唔襯。
Janice Man7分
張：覺得佢着衫進步咗！套衫有格調而且得體，令佢終於跳出o靚「模」框框，但要留意裙嘅長度，短少少會感覺青春啲。
瑞莎6分
張：整體望落好輕便，好有夏日氣息，夠應季同時好啱佢嘅年紀，但對鞋款太隆重，同便服打扮唔係好夾，換對輕便嘅涼鞋會更好。
佘詩曼7分
張：呢條裙簡單易着，配合佢夠Slim嘅身形效果唔錯。唯一問題係對鞋同條裙太撞色，如果着對淨黑色或接近金屬色嘅鞋會效果更好。
張學潤Profile
著名時裝設計師兼指導張學潤（Nelson），在娛樂圈打滾近廿年，審美眼光獨到，評衫作風大膽敢言，在行內有「時裝判官」之稱。
陳法拉
胡杏兒
莊思敏
熊黛林
鄭融
諸葛梓岐
Janice Man
瑞莎
佘詩曼
張學潤