笑到上頂 霆鋒：唔會畀栢芝嚟

鋒芝婚變傳聞擾攘逾兩星期，據知連日來仍沒有溝通的鋒芝心情各異，形勢上謝霆鋒目前佔上風，反而張栢芝心急如焚。據悉閉關兩日的霆鋒已「諗通晒」，昨日精神復工即搵命博，化身「甩繩馬騮」在鐵架上大展身手兼凌空做Sit Up，又不經意露出勝利笑容！

謝霆鋒和張栢芝婚變風波愈鬧愈大，觀乎連日來鋒芝形勢，霆鋒可謂佔盡上風！日前本報獨家報道栢芝以短訊「兇」老公離婚，結果「玩大咗」，反令霆鋒「反客為主」態度企硬；外界反應偏向力挺霆鋒，令他贏盡「民意」；昨日本報再披露栢芝大打溫情牌，日內將飛赴馬來西亞全力箍煲，據悉由於霆鋒閉關兩日已經諗通睇透，心中對婚變一事已有明確答案，故昨日復工時心情大好，笑容燦爛。

向劇組派定心丸

對於栢芝可能將攜子到馬來西亞一事，劇組嚴陣以待，但據知霆鋒已向工作人員大派定心丸：「你放心，我唔會畀栢芝嚟！」霆鋒經理人霍汶希說：「冇聽過，我喺澳門，詳細問表哥（霆鋒助手）。」而表哥亦表示不知情，但英皇以防萬一或派人給霆鋒護駕迎戰。

昨晨九時，霆鋒和周杰倫（Jay）及其他演員，坐一小時車到吉隆坡一個郊區繼續拍攝英皇電影《逆戰》宣傳片，雖然受婚變傳聞影響，但霆鋒心情不俗，有別過往數日的Cool樣及愁爆表情。

霆鋒和Jay拍攝第一個鏡頭時，霆鋒獲四名保鏢護駕，身穿黑色背心及灰色褲的他，露出結實壯臂，其右手更有假紋身。由於天氣酷熱，霆鋒熱到禁不住用手抹汗，拍完一個Take即與Jay在化妝車內喝果汁解渴小休。

大晒腰力勁

之後二人在附近搭建的遊樂場繼續拍攝，由於不安排採訪，現場十多名記者只能離遠拍攝，同時吸引不少街坊及粉絲圍觀。該幕宣傳片場口講述霆鋒追逐Jay，二人搵命博攀到鐵架的最頂點展身手；霆鋒與Jay有說有笑，身手靈活的他還在鐵架上示範凌空做Sit Up的高難度動作，腰力驚人！

雖然動作牙煙，但霆鋒一於少理，與Jay在鐵架上擒來擒去，霆鋒兩腳Fing住再掹實鐵架，一躍跳落地，博得不少讚嘆聲，助手還拋了飲品給他們解渴，當Jay發現記者時口噏噏，逗得霆鋒大笑；同場還有廖啟智、金燕玲及三位小演員。

及後Jay先行離開，霆鋒換上厚身長袖外套拍另一場景，此時霆鋒被扣上「孖葉」、嘴角化上「傷口」妝，兼額頭貼膠布，造型幾可亂真，與吳嘉龍拍對手戲。拍畢後霆鋒登車離開，約晚上七時返回下榻酒店，未知是否為避傳媒，他直接由停車場下車再返房休息。

另外，婚變傳聞至今，兩位當事人表現沉默，但傳言滿天飛。除了有報道指栢芝曾在片場哭訴外，昨日有馬來西亞報道指她曾致電霆鋒助手表哥，但無法與老公取得聯絡，亦有傳霆鋒透過電話向栢芝爆粗，但昨晚表哥回應說：「當然冇啦！都冇傾過偈，點爆粗呀？」