傅嘉莉魔幻情緣

模特兒傅嘉莉（Kelly）入行多年，曾與成龍、房祖名及周杰倫等男星合作，卻與緋聞絕緣，原來她曾被偶像周杰倫以撒手鐧魔術冧到面紅耳熱，躺在對方胸膛上更有窒息之感，奈何合作時間所限，「情緣」無疾而終。

傅嘉莉出道時參演電視及電影，其後轉型當模特兒，近年回歸影視界。Kelly的曝光率或許較靠騷身材的模特兒低，惟她在模界的成績絕不遜色。其實Kelly較潮模Angelababy及Janice Man更早躍登大銀幕，還更早衝出香港，將市場拓展至日本、韓國及泰國等東南亞國家。

Kelly沒有介意曝光率低，入行5年的她自覺在08年已算上位：「當時冇諗過可以接替容祖兒同衞蘭，做到護膚品品牌成個系列嘅代言人，簽咗公司後花咗3年時間就有呢個成就，品牌老闆對我好有信心，我知道接到呢個代言後興奮咗一個禮拜，女仔賣護膚品係特別開心。」她又說：「嗰年後覺得升咗，喺模界搵到個位置，唔係話好賺錢，但呢個代言成為一個地位、形象、工作能力嘅肯定，幫到我之後接唔同護膚品廣告。」

緋聞絕緣體

在事業方面，Kelly可謂平步青雲，先後夥拍成龍、房祖名、周杰倫（周董）、周柏豪及余文樂等拍廣告，雖然合作的男星眾多，她卻是零緋聞。她說：「我係好認真嘅女仔，家庭觀念重，愛情同工作分開，唔想愛情高調張揚，愛情係兩個人嘅事，唔想同事業扯上關係，如果唔覺意畀人知，惟有接受。」她要求男友要明白她的一切。

自言是工作狂的她仍是單身，身邊只有要好的異性朋友支持，不過實情是她曾為周董「心動」，坦言與對方零距離相擁時幾乎窒息，至今憶起合作的畫面，她依然冧爆：「同周杰倫係拍服裝硬照，要攬住佢，又喺草地上瞓喺佢胸膛，嗰吓就窒息，本身鍾意佢啲歌，帶咗好多佢嘅唱片準備畀佢簽，但最後都冇簽到，太緊張啦！」

她表示工作前兩人有飯敍及傾偈「熱身」，避免埋位時過分緊張。她又大爆周董如傳聞所指愛表演魔術冧人：「拍攝時做好多氹我嘅嘢！傳聞中嘅魔術都有做，用小魔術令大家開心，但佢工作時間表好緊密，相處時間唔多。」問到有否被冧到？她說：「其實我個心跳到就嚟暈，唔使胭脂都面紅，佢好捉到女仔嘅心。（佢力追你？）唔會，認真工作，唔諗緋聞。」

她坦言沒有奢望成為「J女郎」，但不諱言欣賞對方：「甘心做佢小Fans，希望有另一種形式合作，MV都有興趣。佢好多才多藝，個人好有藝術細胞，冇真正讀過戲劇都演繹出唔同嘅角色，最鍾意佢喺《不能說的秘密》嘅演出。唔會特登搞緋聞，唔會投放專注力喺呢啲事上面嚟上位，同佢合作已經OK，唔着重名稱。」

在眾多紅星中，Kelly覺得成龍兩父子最為搞笑，還大爆他們鮮為人知的笑料：「我哋拍內地版可樂廣告，兩父子喺裏面爭住請我飲嘢，成龍大哥都話劇情誇張，我哋喺搭出嚟嘅便利店度拍，成龍大哥未埋鏡頭前就蹦蹦跳跳，不停好曳咁拆食物嚟食，反而祖名叫佢唔好搞，話貨架唔同樣會影響連戲。」

性感多面睇

夏天來臨，又是寫真集「胸」湧而出的季節，Kelly對於寫真亦有憧憬：「始終女仔青春有限，想喺青春燦爛時影批靚相出嚟，拍廣告嗰啲係因應客戶要求，未必係真正嘅我，所以都想出書或出碟，記錄真正嘅自己。」可惜她目前未能下決心推出寫真：「冇諗過出寫真，不過最想出書多謝身邊嘅人，做咁多工作唔係靠一個人嘅努力。」

談到性感，Kelly並不抗拒：「性感喺好多方面表現出嚟，有時啲相着晒衫都有吸引力，性感唔等於暴露，唔係負面形容詞。」

後記

在模界有一定成就的Kelly對自己要求高，目前計劃再闖影壇，身為佛教徒的她並未完全淡泊名利，坦言以攞獎為目標：「憧憬拎女配角、女主角，細個有諗過拎到獎上台講乜，想好似啲前輩講得咁感動，獎項係肯定，未必係終點，最大嘅滿足感係拍完一場，導演讚做得好。」