詩雅揚威海外美國封視后

詩雅早前摘下首個「最佳女主角」殊榮，喜出望外。成為影壇新貴的她更被公司力捧，稍後會飾演一個「鬼上身」的角色，演技再受考驗。

入行三年多的英皇藝人詩雅，早前為電台的電視節目拍攝短片《愛回家》系列，飾演一名患有小腦萎縮症的女生，由於是真人真事改編，為求演繹神似，詩雅開拍前做足功課，還親往探訪該位女生，結果演出備受讚賞，還一擊即中贏得獎項，她興奮地說：「電台拎咗段片去美國參展，點知得到女主角獎，知道嗰下仲以為發夢！」

詩雅直言獲獎後信心指數飆升：「呢個角色好難演，依家有人欣賞，係一種鼓舞。（嗰位女生知唔知？）已經第一時間話畀佢聽。」

扮鬼上身嚇男友

稍後詩雅會接拍兩部電影及一齣舞台劇，她感激公司給予機會：「其中一部戲內容同靈體有關，我個角色會畀鬼上身，搞到自己有雙重性格，係另一個挑戰。」詩雅笑言愛扮「鬼上身」：「以前試過扮鬼上身嚇初戀男友，嚇到佢即時揸住我中指，我都覺得自己好衰。」

問到新片要否性感演出？詩雅說：「唔使，其實自己有少少怕咗拍性感戲，需要較長時間抽離。」除了電影外，稍後她還處女下海參演舞台劇，與好戲之人鍾景輝及師兄關智斌、張致恒合作，令她十分期待。