拉姑殺上律師樓

謝霆鋒和張栢芝的婚變傳聞未停過，連霆鋒的億萬財產亦備受關注！昨日狄波拉突然現身中環律師行，令人揣測她是為兒子「辦事」。而早前在節目中爆「鋒芝」家事的查小欣，昨日在活動上揚言不擔心栢芝會嬲：「最驚講嘅係事實。」

拉姑一向疼錫霆鋒，有傳拉姑為霆鋒出頭，不惜着好友查小欣在電台大爆「鋒芝」婚變內幕，指女方「榨乾丈夫身家」，每次鬧交，霆鋒都會將手頭物業轉給栢芝，甚至是謝賢的千萬豪宅也不放過，令她覺得栢芝很陌生。

霆鋒除拍電影外，近年生意亦上了軌道，成為億萬富豪的他，如果將來真是要申請離婚，財產分配頓成焦點。昨日拉姑正午時分，已吩咐司機到報攤買齊各份報章、雜誌，似乎是要了解兒媳的最新情況；至下午三時半，拉姑與老公鬍鬚Kong和傭人乘車離開曉廬寓所，並提着一個超大手袋上了中環雪廠街9號一間律師行，全程一臉凝重，似乎是要辦理一些「手續」。

四哥：「我冇嘢講」

而近日盛傳「鋒芝」要經律師做中間人「對話」，今次拉姑上律師樓，難免惹人揣測。記者在樓下等至晚上八時也不見他們，相信已從秘道離開。

至於四哥昨日在電話中表示不清楚拉姑去律師樓做甚麼？他說：「你估我咩都知呀？你哋乜嘢都問我，我冇嘢講。」

另一邊廂，被指「多事」的查小欣，昨日出席餐廳開幕時，被問到擔唔擔心畀四哥謝賢「星埋牆」？她說：「四哥冇打畀我，都冇我電話。（佢話兜巴星你埋牆？）佢個個都話星埋牆啦！（怕唔怕得罪四哥？）大家都係睇番件事，件事係咁就咁，講出嚟唔係討好或得罪邊個。（怕唔怕加速人哋離婚？）唔識估。」

「授權爆料」不置可否

對有傳是拉姑授權發言，她說：「我唔回應，大家估完一個又一個。（怕唔怕人哋話你搞是非？）我原意唔係咁，只係報道事實同分析，既然大家覺得咁唔應該，咪唔好睇、唔好跟進囉！我都係做番我嘅工作，冇背後意思。（之前所講都係事實？）如果唔係嘅，已經有人出咗嚟啦！（有冇搵栢芝？）冇，要嘅，佢自己會嚟搵我。（消息來源係邊個？）我要保護證人。」問到擔不擔心栢芝會嬲？她語帶雙關說：「唔係驚唔驚嘅問題，最驚講嘅係事實！」