栢芝停短訊等霆鋒出招

謝霆鋒和張栢芝陷冷戰後，栢芝經常傳短訊給霆鋒，但霆鋒不為所動。眼見短訊攻勢未奏效，栢芝前日開始一個短訊也不傳，望以此引起霆鋒關注！ 謝霆鋒和張栢芝鬧婚變，有指內情是栢芝自鬧出機艙自拍事件後，令霆鋒感到十分不快，與栢芝陷入冷戰，但她疑不忿被責備，上月中更傳絕情短訊，Send出最影響夫妻感情的字句「我要離婚」，希望以激將法令霆鋒回心轉意，但霆鋒看後感到傷心及失望，再加上栢芝叫霆鋒找律師聯絡她的律師，令他扯火企硬，只找律師聯絡栢芝律師。栢芝見霆鋒不聞不問，即「變陣」改以深情短訊冧他，不時寫些「我愛你」、「我好掛念你」等冧爆短訊，希望霆鋒回心轉意「賜覆」，但他不為所動。故此，昨日有指栢芝由前日開始，停止了這場單方面發起的「短訊」戰，由日傳多個短訊，突變零短訊，希望以「冇反應」來引起霆鋒注意。

酒店打機宣洩鬱悶

雖然有關「鋒芝」的消息滿天飛，但兩位當事人對外界繼續採取緘默態度。昨日，身在吉隆坡的霆鋒不用開工，但因他知道大批傳媒追訪，以免曬太陽游水變成開記者會，整日留在酒店房內打機宣洩鬱悶！另一邊廂，栢芝昨日在深圳為關錦鵬新片《影子愛人》開工，雖然是拍室內景，但關錦鵬為了栢芝不被媒體騷擾，聲明加強保安看守，而栢芝的戲份將於下星期完成，然後會放假至下月一日，再到內地為另一部電影《河東獅吼2》開工。

祖兒想約霆鋒食飯

至於與霆鋒一向交情甚篤的容祖兒最近正於馬來西亞工作，昨晚近10時，祖兒現身吉隆坡的黃亞華小食店，跟霆鋒助手「表哥」等食飯，見到記者十分愕然，她說：「我嚟拍廣告，約『表哥』食飯。（點解唔搵霆鋒食飯？）佢唔方便，酒店樓下咁多記者，叫『表哥』幫我帶問候畀佢就得。」

問有冇跟霆鋒通電話？她說：「冇，都唔知講乜好，想約佢食飯，但佢想留喺酒店。（同栢芝熟唔熟？）OK，好耐冇見。」

另外，霆鋒經理人霍汶希昨日被追問霆鋒情況，她說：「我尋日聯絡過霆鋒，但冇講私人事，今次佢拍戲好多危險鏡頭，我叫佢咩都唔好諗，唔想佢整親！（霆鋒依家情緒點？）冇乜特別！」又有傳栢芝有意飛吉隆坡搵霆鋒，霍汶希說：「私人事唔主張講太多！（有冇聽過栢芝借財務炒樓？）冇聽過！」

前晚因曾有傳英皇會發聲明，以致傳媒狂打電話給霍汶希求證，剛巧她不在電話旁邊，其後看電話見有幾十個電話沒接，嚇了一跳。另外，有內地雜誌指霆鋒北京包二奶。