嘉穎股罅吸高收視 杏兒出口術：露多啲
向來以靚仔作賣點的鄭嘉穎在新劇中首次露「股罅」，拍檔胡杏兒還將照片放上微博谷收視，但當要求嘉穎若收視好時露多些，他未有答應。
嘉穎、杏兒、陳敏之、李璨琛、林子善及《怒火街頭》幕後同事，相約往深水埗食晚飯睇劇集。杏兒說：「收視三十點，多得嘉穎露男人事業線，我借佢個『優質股』上微博吸收視。（仲有咩露？）敏之露長腿。（你呢？）我展露口才，咁我同嘉穎都有場激咀戲。（收視更好點慶祝？）叫嘉穎再露多啲！」
自度掹鼻毛
嘉穎在劇中演「爛撻撻」大律師，繼「露股罅」後又「掹鼻毛」，對於兩吋股罅吸高收視，嘉穎笑說：「導演提議時都諗咗一陣，掹鼻毛就係我自己諗。（杏兒建議收視好啲你再露多啲？）我要同李璨琛佢哋三個麻甩佬商量吓先。」
另外，對於被指拍攝《拳王》時「公子病」發，扮大牌又遲到，還踢傷陳志健，嘉穎認為報道亂寫無法制止，不想多作解釋，至於踢傷人，他建議大家去問陳志健。
杏兒感激嘉穎露「男人事業線」，提升收視。
與李璨琛睇劇的陳敏之大晒長腿，成為另一賣點。
《怒》劇台前幕後到深水埗食飯睇劇。