港男面試變晒碌木

香港先生選舉昨日在九展進行面試，有32位參賽者到場，但質素一般，往年不少都會騷肌博出位，但今年的則相當被動，肌肉男欠奉之餘，更要三催四請才擺甫士。

原本昨日有40名參賽者面試，但卻有8名甩底，參賽者普遍質素平平，肌肉型男欠奉，有些更要在傳媒多番要求下，才擺出大隻甫士及跳舞動作，據知當中有任職健身教練、舞蹈員及紀律部隊，亦有數位專程由加拿大、英國及美國返港面試。

翻版黃長興搶鏡

任職紀律部隊的「翻版黃長興」甫到場便識做地放下篋擺甫士博搶鏡，更擺出成龍舉兩隻手指公的招牌動作。其後只有3位參賽者做出拉丁舞、霹靂舞及踢腿動作，場面沉悶。而其他參賽者都只是棟篤企，如「滴汗小方」、「大隻陳豪」、「o靚版池珍熙」、「作狀黃德斌」、「拉長甄子丹」、「拉丁張立基」、「電眼周柏豪」及「妖版謝天華」（Nothing哥）等。

監製衞世輝說：「參賽者除咗着泳褲同才藝表演外，仲會睇佢哋有冇紋身，大會係唔介意紋身，但要知道佢紋咗啲乜，如果變為公眾人物，都會叫佢哋行為檢點。」今次面試者年齡由20至40歲，當中會挑選10至12位於下月16日假電視廣播城進行決賽。