Jill施擒拿手箝實6呎型男

衞詩（Jill）日前向本報自爆跟年輕四載的中英混血男友Tim拍拖。前日Jill偕身高6呎的男友現身中環，熱情如火的Jill全程施展「擒拿手」俘虜男友，兩人儼如連體嬰般形影不離，愛得十分癡纏！

自Jill跟關楚耀09年在日本藏毒被捕後，兩人飽受壓力而斬斷情絲。經過2年時間洗禮，他倆各自重新出發，Jill更在教會認識現任男友Tim，兩人拍拖逾半年，身為虔誠基督徒的Jill更指跟身在外國讀書的男友譜異地戀有助禁慾。剛放暑假由洛杉磯返港的Tim，前日甫落機即飛奔中環跟Jill見面解相思之苦，處於熱戀期的小情人瞬間熱情奔放。

前日傍晚六時，Jill頭戴黑帽襯黑色透視短裙，在德輔道中的教會大堂跟教友閒談，突然一名身高6呎的型男走近Jill，雙方甫見面即相擁足足一分鐘。Jill將雙手掛在男方頸部，並含情脈脈地望着對方，並側身靠近對方的頭竊竊私語，其後兩人十指緊扣轉身離開，才知原來是其男友Tim。

Jill跟Tim由教會漫步至中環HMV買唱片，未知是否久久冇見，Jill沿途多次使出「擒拿手」箝實男友頸部，Tim要烏低身遷就，但仍相當受落。當兩人步行至斑馬線等候期間，一名女乞丐突然上前「篤」Jill的屁股討錢，嚇得她驚叫！當定過神來，Jill跟男友分別拿出錢包施捨，再雙雙過馬路乘扶手電梯走入HMV。期間她再以雙手緊緊箍實Tim頸部，未有理會旁人目光。

「伯母」曾反對拍拖

記者致電Jill詢問為何其男友返港？她冧爆說：「佢放暑假返嚟香港，我哋成大半年冇見喇！所以一見到真人就好開心，佢攬住我第一句就話好似發緊夢咁！」Jill透露男友逗留至下月底才返洛杉磯升學，雙方父母得悉兩人拍拖，而男友媽咪已知道她的日本藏毒事件：「Tim同佢媽咪講晒，初時佢都反對我哋一齊，但後尾就冇嘢，仲好支持我哋！（舊愛關楚耀公開祝福你？）好多謝佢，我都祝福佢事業發展順利，之前我生日，佢都有打電話同我講生日快樂，我同佢經歷過咁大件事又拍過拖，大家都會支持大家！」