祖兒大個女透視玩SM

前晚容祖兒以性感透視裝打扮演出音樂派對，其一招「微波倒奶」式熱舞，加上懾人的天后魅力，難怪連韓國型男SE7EN也Chok住靚仔樣，表示想與祖兒見面。

祖兒以壓軸嘉賓身份演出假機場博覽館舉行的《亞洲巡迴音樂派對》。身穿透視裝透黑Bra的她，配襯皮頸箍及腰帶，營造SM味。當祖兒躺在男舞蹈員身上，再向後作45度角拗腰時，突出現「微波倒奶」的香艷場面。對於身材變得有睇頭，祖兒說：「幻覺啫！」她坦言以前刻意收起身材，但現時覺得要順其自然，又估計與近期沒有減肥及「大個女」有關。祖兒又透露日前拍了三日廣告，僅用幾小時綵排，緊接又到馬來西亞工作，連廣東碟的錄音也沒有期：「希望九月出到廣東碟，跳舞歌就留番喺國語碟。」

至於SE7EN的演出亦是音樂派對另一高潮位，他表示不太清楚同場有哪位歌手，但當聽到祖兒的名字時，即以英文說：「I want to see her。」問到有否女友時，SE7EN大方表示女友正身在韓國。

鄭融負傷扭蛇腰

而穿上五吋高跟鞋的鄭融，喪扭蛇腰跳熱舞，但她大呻右腳痛：「可能之前喺澳門扭親。（仲着五吋高跟鞋？）着咗反而冇事，但冇着鞋喺屋企行又痛。」她坦言沒有想過叫老外男友為她捽腳。

此外，港、日、台共12位模同場行貓步。日模松岡李那露出大半個Nude Bra，但被「陽光妹」何思諺上漏胸墊下露打底褲搶風頭。DaDa Lo（盧頌之）、「邦民女」Anjaylia（陳嘉寶）、台模吳亞馨、瑞莎、Alice B.等亦搔首弄姿。但DaDa不慎跣腳仆一仆，而冇份行騷的「百果園咪神」陳靜則與「萬寧哥哥」沈志明齊捧場，未知沈志明是否捧緋聞女友瑞莎場。