破繭陳柏宇蛻變

曾在公開場合被指「動L」演唱而一「舉」成名的男歌手陳柏宇（Jason），不經不覺已入行逾五年。事實上，每位歌手也愛突破自己框框，不再局限發揮，Jason亦不例外，他銳意打破入行初期的乖乖仔形象，在歌影方面均嘗試作出突破。

Jason曾化身「妖男」拍攝唱片封套，妖味十足，而外界反應亦甚為受落，而最近他在電影方面更加「唔聲唔聲，嚇你一驚！」

處男床戲

Jason處男下海拍激烈床戲，與周秀娜師妹兼新八模的何佩瑜（Jeana）在新片《喜愛夜蒲》埋身肉搏，Jeana以手遮胸性感誘人，令不少宅男恨得牙癢癢，而Jason的背部紋身亦因而「曝光」，他不諱言這是從影以來最激的演出，拍攝時心情緊張：「開頭都唔知咁激，只係知道要錫，但唔知有床戲，後來知道要拍，惟有飲兩杯酒定驚。（感覺如何？）有啲尷尬，但總算衝破心理關口，冇乜NG。」

面對性感尤物Jeana，有否禁不住「動L」？他說：「冇啦！我問過其他演員，拍情慾戲時會唔會有『反應』，原來係唔會嘅，因為咁多人望住，邊有心情『動L』呢？（佢讚你好勁？）多謝畀面。（Jeana身材勁？）佢真係好勁。」

全裸免問

至於是否有機會發展「雙J戀」？Jason說：「靚就係人都鍾意。（發展對象？）咁就一定唔係。」他笑言如果女友身材太好，擔心被其他男士望蝕：「以前女朋友身材唔算好勁。」

Jason今次豁出去演床戲，是繼「動L」片段在網站瘋傳後，再次成為熱話。問到拍攝時有否顧慮歌手形象？他說：「咁又冇，早兩年拍或者會，但都入行幾年，如果再局限自己，只會少咗更多機會。（考慮全裸演出？）抿水啲。（劇情需要？）未有呢個諗法。（紋身曝光？）算係另一個突破，只係唔想太多Focus喺個紋身。」

想演奸角

新一代舞王陳偉霆近年拍戲愈來愈大膽，演過不少情慾戲，問到會否挑戰對方？Jason謙稱：「冇得挑戰喎！佢身形咁弗，又有咁多舊（指肌肉）。（最想演乜嘢角色？）奸角或者精神病患者。」

歌唱方面，「四大」與無綫的版稅風波至今仍未有起色，屬「四大」歌手的Jason，被問到事件是否影響上位機會？他說：「唔可以話冇影響，但唔擔心得太多，惟有靠其他平台宣傳自己。（點形容依家位置？）繼續嘗試唔同新嘢，無論喺形象同戲路，都希望畀到Fans新鮮感。」

後記：吹水王呻Dry

Jason除唱得外，亦相當Talk得，他表示平時與同門師弟林奕匡吹水，但甚少談及兒女私情，Jason說：「無謂提起自己傷心事。」他與Jeana在戲中肉搏連場，但現實生活中就Dry到爆，他說：「好Dry，嘴唇好乾。（識其他女仔？）唔搵住，要睇緣分。」