釋放卓韻芝自我

突破，意即求變，解決方法是嘗新。卓韻芝和陳柏宇今年分別在舞台上、銀幕前嘗試新搞作。惜分重秒的阿芝，堅拒悶親自己，決定開棟篤笑娛人娛己；而渴望蛻變的陳柏宇，首次演繹激情戲，從乖仔形象破繭而出。

自由創作人卓韻芝，一向是悶棍絕緣體，「試新嘢」是其家常便飯，亦是終身職業。14歲做DJ，其後編劇、作家和導演等角色統統試勻，在常人眼中她的歷練已豐富到暈，不過她未言滿足，繼續要玩突破，點搞？今年她決定搞Talkshow，在舞台上測試自己的魅力！

演棟篤笑

去年倫敦留學返港，叉滿電的阿芝動力爆燈，決定於7月中在演藝學院搞《卓韻芝死去活來One Night Stand》娛樂大家，她說：「想試新嘢同辛苦嘢，好想把握我嘅人生，好驚冇喺適當時候做適當嘅嘢會後悔，Talkshow係其中一樣嘢，等大家睇吓卓韻芝有幾好笑。」

新挑戰在前，她形容「非常淆底」：「我一寫稿就想瞓覺，寫稿度稿好緊張，有向前輩請教，但一般都畀唔到答案，叫我對鏡練習，林海峰同我講：『做吓做吓就得o架啦！』」她透露舞台設計有趣：「想觀眾一行入場館好似出街咁，我可能喺台上換衫、收衫。」

仰藥自殺

五年前，阿芝疑因禁不住母親離世打擊，留書仰藥自殺幸被救回，記者以「早年人生不愉快事件」幾隻字剛問出口，她冷靜快語地說：「係自殺。」事件本身帶有灰色調子，現在回想往事，卻是截然不同，她感觸又悠然地說：「活第二世咁，呢一世想做啲新奇嘅嘢，唔好太悶就最好，件事發生之後畀我有奇妙動力、正能量。人生經歷過一幕係一幕，會積存。」

阿芝才氣備受注目外，與組合Mr.成員MJ的一段情亦成傳媒話題。兩人於去年中和平分手，拎得起放得低的阿芝說：「同MJ依家都係朋友，但好少見到，大家都忙，作息時間太騎呢，又住得遠，舊年返香港之後都係見過佢一次。」

拍拖咪搞

大方面對舊情的她，甚至不介意將MJ擺上枱：「個Show有一段係笑佢嘅，會叫佢嚟睇！」一度愛情大過天的她，現時對生活有以下排名：家人、朋友、工作，愛情呢？她笑說：「可能跟住係行街，隔一段時間先到愛情都得！唔諗住嘞！拍拖生活好重複，每日放工後嘅身份就係搵條仔，變咗好似每日睇吓阿婆買餸未、有冇腰骨痛咁嘅習慣，佔據晒自己所有空間同時間。我想多啲時間照顧婆婆，做啲新又辛苦嘅嘢。拍拖？唔好搞我，唔得！」

後記：最愛棟篤笑演員

有請阿芝介紹最愛的喜劇/棟篤笑演員，她說：「Eddie Izzard易服、物料絕對原創、有好強烈個人風格，內容荒謬超現實；至於Sandra Bernhard言論大膽同自我，多次上大衞牙擦騷唔理David Letterman，自己講自己嘢，畀佢喝罵；而Sacha Baron Cohen鍾意以虛構角色嚟演出，對佢角色同快閃黨式嘅設計感到好奇。」