樂基兒有膽色長腿Tone透

夏日炎炎，女星愛將至靚部位Show Off，袒胸、露背、騷肩、Sell長腿甚至玩透視，務求「散熱」之餘，又向男士派冰淇淋！時裝設計師陳刀讚「明嫂」樂基兒「透」出韻味。

樂基兒9分

刀：佢呢身透視打扮好靚，而且都幾大膽，成個色系都OK，顯得佢對腳好長。不過，Set呢個髮型可以唔戴呢對耳環，或者束起頭髮。

官恩娜8分

刀：佢呢條裙有Skin Tone，充滿夏日氣息，望落去好舒服，又可以Sell長腿，襯埋短髮好清爽，佢着衫進步咗好多，而且靚咗好多。

高海寧7分

刀：騷胸係佢嘅強項，佢一向Carry到呢類型打扮，一來佢本身夠高，而且身材又勁，性感得嚟又唔會令人反感，係一貫佢嘅Style！

何超儀6分

刀：佢以簡約嘅露背打扮散熱係冇問題嘅，但黑白間條向來「蝦」人着，若然條裙再短少少會更好。

李雪瑩5分

刀：條裙顏色令佢成個人老咗，冇乜夏天Feel，若然變成鮮黃或鮮紅都OK，呢隻紫紅色太秋冬感覺，同埋佢啲頭髮鬆散啲仲好。

石詠莉5分

刀：雖然佢騷膊，但條裙款式略為老土，隻色亦唔係好得，加上襯黑色腰封，搞到好尷尬，顯得斜膊位更加重，唔夠靚囉！

江若琳8分

刀：呢條碎花裙好靚，好有夏日色彩，好活潑。佢今次揀啱衫，而且可以騷到身材，原來佢身材都唔錯喎！

薛凱琪7分

刀：佢呢身打扮都有啲夏天Feel，隻淡黃色唔錯，但黑色背心就顯得比較突兀，如果轉為白色可能仲好。

陳嘉桓8分

刀：佢着得好性感，都幾有夏天Mood，條裙嘅Print好靚，但以佢年紀其實可以再青春少少，戴番隻手鈪效果更好。

陳刀Profile：

陳刀在香港理工大學修讀設計後，創立個人時裝品牌，除了搞時裝外亦有出書。

（10分為滿分）