黃淑玲拒隨波逐流

不少女星花招百出力求名利雙收，不過選美出身的馬來西亞小姐黃淑玲卻不願隨波逐流，堅守性感底線！

曾被封為「翻版熊黛林」的馬來西亞小姐冠軍黃淑玲（Sherine）憑33C上圍及43吋長腿攻台灣、馬來西亞及北京模特兒界，備受注目，去年轉戰香港，雖然不是密密接Job，卻十分滿足，成功與否交由上天注定，她認為趁後生應要去享受人生︰「我好Enjoy我嘅工作，唔會諗點先會紅，點先可以賺多啲錢，我係為興趣先去做模特兒！」

堅持三點不露

在Sherine眼中模特兒工作是高貴的，要成為當紅模特兒並非靠是非、靠緋聞才可上位，而性感底線亦非常重要，她說︰「我好鍾意着比堅尼，工作要着泳衣、內衣，我可以接受，最緊要三點不露。」她有意於年底推出寫真集，問到是否要避開暑假寫真混戰？她直言不是，反而希望寫真集是最完美︰「我搵咗好多著名攝影師幫我影相，我希望相集係完美！唔想馬虎！當然相集係行高貴路線，就算性感都係健康性感，我只可以話係分享生活嘅相集，唔知算唔算係寫真。」

談到工作，Sherine說：「好想試唔同嘅工作，入娛樂圈係興趣，唔理喺邊度做嘢，做模特兒還是做主持、做歌手，我都好享受，人一世梗係咩要試吓！」不少模特兒轉型拍戲或做主持，她亦是其中一位，除了主持旅遊節目及籌備義賣畫展做善事外，自小愛唱歌的她最近計劃出唱片︰「從來冇諗過做歌手同出唱片，今次隻唱片唔知會係紀念品還是有人欣賞，可以繼續發展。（點解有呢個計劃？）年頭聽到Rubberband首《Simple Love Song》就鍾意咗首歌，決定翻唱。」

隨時閃電結婚

正因Sherine抱着想做就去做的心態，經朋友介紹認識監製這首歌的雷頌德，還膽粗粗跟對方表示想翻唱這首歌，豈料雷頌德一口答應！她說︰「我用E-mail同佢聯絡，之後Send咗之前學唱歌嘅Demo畀佢，估唔到佢讚我把聲好特別，覺得我會唱得好，所以應承畀我翻唱，我真係好Surprise！可以同香港數一數二嘅監製做嘢喎！」現時她正忙於準備翻唱這首歌，RubberBand亦功不可沒，她說︰「佢哋會畀意見我，叫我重填英名詞，但最後都冇用，唱國語版本，可能我填得太差！」

因為享受演藝工作，Sherine坦言過得快樂毫無壓力，從她面上流露的喜悅，難免令人誤會她得到愛情滋潤！她笑說︰「我依家冇拍拖，有冇好男仔介紹？之前個男朋友因為大家價值觀唔同而分開，不過我好簡單，只係想搵個大家都夾嘅人喺身邊，靚仔、有錢都係其次。」看似一切隨緣的她，卻十分渴望組織自己的小家庭︰「遇到Mr. Right當然會結婚生仔，閃婚都話唔埋！」

後記：苗條索女仲嫌肥！

「貪靚是女人的天性」這個定理，從身材纖瘦的Sherine身上可以看到，訪問當日她總是把「影得瘦唔瘦、靚唔靚o架？」這句話掛在口邊，十分着緊照片拍出來的效果，於是小記便跟她說︰「你咁瘦影出嚟邊會肥呀！」其實Sherine如此纖瘦還擔心甚麼呢？看來「瘦」的定義在小記和她眼中真是十分不同！