陳自瑤遭「電眼峯」Chok親

陳自瑤在新劇中飾演林峯女友，並有錫面情節，她坦言遭「電眼峯」Chok親！

無綫姐仔陳自瑤（YoYo）在新劇《花花世界花家姐》中，飾演林峯女友，與佘詩曼陷入三角戀。首次與「電眼峯」合作便有機會談情，YoYo坦言既驚且喜：「佢咁多女Fans，加上我有場戲要錫佢塊面，都有擔心激親佢啲影迷！」她又大讚林峯電眼迷人：「之前同佢唔熟都怕尷尬，點知第一日合作就覺得佢好有紳士風度！仲有佢對眼好迷人，成日不經意畀佢電親！」

入行接近十年的YoYo，天生一副娃娃臉，猶幸經多年改造終擺脫「妹妹仔」味道：「娃娃臉始終對角色有局限，我希望可以喺幕前演出更多唔同類型嘅角色，好開心好耐冇做人哋個妹同冇人再搵我扮學生妹！」

練舞跳鬆「硬骨頭」

即將投入拍攝新劇《樂府藏龍》的她，對於飾演馬賽家姐感興奮：「終於唔使再做妹妹喇！劇入面我要跳舞，所以之前花咗好長時間去練舞，我啲筋骨唔算軟，所以對我嚟講都幾辛苦！」