洪卓立變花釀少年

洪卓立今日推出新碟，以花「釀」少年的造型拍攝封套。入行後一直單身的他，由於太忙而沒有時間拍拖，不過提起緋聞女友湯怡時，卻欲言又止。

洪卓立（Ken）今日推出第六張個人專輯《透視》，昨日到電台宣傳時自言新碟「透視」了自己很多事，包括感情。問到有否邀請緋聞女友湯怡擔任MV女主角，以表達感情？他即支吾以對，令人懷疑他與湯怡之間是「真有其事」。Ken更坦言有喜歡的人：「不過入行後太忙喇！都冇時間拍拖！（公司反對？）唔係，Mani（經理人霍汶希）都有叫我拍！（同公司嘅人拍？）見得最多係鍾舒漫，但佢信耶穌，我信佛，唔係好適合，拍拖最緊要志同道合！」

媽媽做歌迷會教主

另一方面，Ken的母親成為歌迷會「教主」為他宣傳新碟，十分搞笑，他說：「阿媽同我啲女Fans食飯，仲擺晒合照上微博，搞到好似個Fans同我拍拖咁！（唔鍾意？）阿媽話有助賣碟，不過唔應該係佢做囉！」問到有否介紹湯怡給媽媽認識？他說：「未呀！公司咁多人點介紹得晒？」此外，Ken將近8磅花朵圍在頸上拍攝新碟封面，當中別有用意：「係我特別想做花樣少年嘅感覺，用燦爛盛放嘅花朵代表生命力！」又笑言花樣少年是煎釀三寶那個「釀」，令工作人員笑到碌地。