「藍男」合體Chok甫笨手笨腳

李亞男及王祖藍前晚情侶檔挑戰「甫士王」，雖然祖藍揚言：「唔會衰畀外人睇！」但因與女友高矮懸殊而阻手阻腳！

王祖藍、李亞男、苗僑偉（三哥）、朱茵及阮小儀等前晚擔任《華麗明星賽》嘉賓，穿上四吋高踭鞋的亞男，與男友祖藍分頭搵食，與三哥同組，但她明顯更開心：「我贏咗啲獎金係我，祖藍贏咗嘅獎金都係我！」雖然衣着不性感，但亞男勝在夠高，可惜仍遭祖藍嫌棄：「應該着六吋嘛，你哋都覺得佢同三哥襯吖嘛！（着咁高唔驚女友拗柴？）拗咗啦！佢喺屋企跣親，我帶佢去睇醫生，好彩醫生話冇乜事！」亞男聞言即說：「證明高係冇用嘅！」向矮一截的男友大派定心丸。

朱茵聞凌晨餵奶怕怕

雖然「藍男」並非同隊，但主持草蜢仍醒目地讓他們「合體」挑戰甫士王，期間祖藍口響響吩咐女友「唔好衰畀外人睇」，但高矮差距令他們表現得不合拍，擺甫士頻頻出現「阻手阻腳」的情況，祖藍不禁說：「因為要拖住佢隻手，畀唔到提示佢睇幾號機位，所以話感情係會影響事業o架！」

此外，朱茵替好友蔡少芬誕下巨B開心，問到何時結婚生仔，她笑言每次看到蔡少芬在微博留言指要凌晨起床餵奶便怕怕，故目前仍未Ready。