薛凱琪撼頭傷頸 方大同：長頸鹿小心啲

近日被指情緒抑鬱的薛凱琪，為緋聞男友方大同犧牲休息時間，甫落機即趕往拍大同新歌MV，卻換來對方嘲笑她是「長頸鹿」，相當抵死！

方大同開口邀薛凱琪（Fiona）為其新歌《張永成》拍攝MV，Fiona二話不說立刻應承，一落機即趕去幫忙。大同向外籍導演提出將電影《危險人物》融入MV，於是Fiona戴上Bob頭假髮、塗鮮紅唇膏，大同則梳薯嘜頭、穿黑色西裝，化身電影人物，兩人只穿襪在舞池大跳搞笑舞，Fiona笑說：「大同跳得好詼諧，拍呢個MV最辛苦係忍笑！」

大同坦言跟Fiona私底下相熟，他笑說：「有佢做女主角會令MV吸引更多觀眾，因為佢夠放，好似《葉問》入面嘅洪金寶咁搞笑！」為答謝Fiona的相助，他請客讓對方大擦一餐，不過Fiona日前弄傷頸，大同未有憐香惜玉，還嘲笑她是長頸鹿，非常抵死！

唔開工導演追殺

前晚Fiona在微博上載接受電流治療的照片，原來她日前拍戲時「Fing」頭不慎弄傷頸部，她昨日在電話說：「場戲講我個頭撼落人哋度，導演叫我唔使咁大力，我仲懶醒話得啦！因為係借位，點知Fing咗幾十次，條頸有少少痛，第二日個頭即刻郁唔到，痛到死！」大同得知她受傷，在其微博留言：「長頸鹿是要小心啲。」Fiona笑說：「多謝佢提點。」問到接受電流治療的她會否以工傷索償？她笑說：「我同導演講唔開工，佢就話殺咗我！我未係好嚴重，今日都照開工。（近排多病痛？）係，好煩！咁多嘢。」