祖兒紅衫軍領導潮流

七彩繽紛的服裝能令女藝人散發夏日陽光氣息，舞台服裝設計師姚志康（Andy Daniel）建議穿着鮮色服裝最緊要有焦點，不要穿太多顏色上身，同時要配合化妝和簡約髮型，其中以容祖兒一身由頭「紅」到落腳的打扮最夠潮味！

容祖兒 夠型格 8分

「紅色已經成為祖兒嘅Icon，每次着紅色都特別有型格，再加上全新顏色嘅髮型，更能夠展現潮流尖端帶領者地位。」

周秀娜 變「熟」女 6分

「黃色本身充滿夏日色彩，但襯喺周秀娜身上略嫌帶點成熟同密實。如果相同顏色同物料改為吊帶或者Low Cut，相信更能夠令佢發光發亮。」

羽翹 玩清純 7分

「羽翹條米白色露背裙Sexy得嚟又清純，簡直電死少男！」

葉翠翠 着錯晒 5分

「身為港姐冠軍嘅葉翠翠欠缺時裝觸覺，條裙平平無奇、Cutting比較差，對靴都襯錯。」

Ana R. 最性感 8分

「Ana R.呢一身綠色打扮色彩典雅，我個人十分喜愛，Cutting極度Sexy，相信只有Artist同Model先可以着到，非一般女士可以着出街！」

陳慧琳 添色彩 8分

「橙色好容易令人覺得冇精神、疲倦，但今次Kelly（陳慧琳）加咗啲粉紅胭脂同唇膏，加上配襯草織手袋，更加散發夏日色彩！」

Mandy Lieu 女性美 7分

「Mandy條藍色貼身裙加豹紋手袋簡直係絕配，襯四吋高踭鞋散發女性優美味道，成個人都好靚好Sexy，又唔會過於浮誇。」

Alice B. 化錯妝 6分

「Alice B.條裙充滿夏日色彩，不過黃皮膚嘅人比較難着得好睇，化妝上可以加多少少粉紅，睇起嚟精神啲！今次敗筆在於對鞋，唔應該着對黑色高踭鞋。」

姚志康Profile

舞台服裝設計師姚志康（Andy Daniel）曾與無數歌星合作，作品經常展現於不同的媒體，包括香港及海外演唱會、 MV、唱片封套、廣告形象及服裝設計等。近期為擔任Justin Bieber HK Concert表演嘉賓的美國女子組合Blush設計舞台服裝。