麗素唔恨爆紅玩隱身

加拿大女星麗素麥雅當絲，由當年在《辣妹過招》中敗給蘭茜露漢，到今時今日已變成出入康城電影節的影星。不過，炙手可熱的她寧願隱身冇工開，亦不想成為傳媒焦點！

記：記者　麗：麗素麥雅當絲

記：你覺得自己邊個角色最令人印象深刻？

麗：應該係同蘭茜露漢合作嘅《辣妹過招》中嘅寸嘴舞會王后！《神探福爾摩斯》同《冒牌伴郎生擒姊妹團》嘅角色都有人記得，因為兩片都大賣！好多女仔都記得《忘了，忘不了》，因為佢哋睇到喊唔停！

記：你當年喺《辣》片嘅寸嘴形象，同你畀人嘅感覺好唔同，點解會接呢？

麗：我本來試鏡做蘭茜演個「被恰」角色，當時完全冇諗過會由我演呢個尖酸刻薄嘅角色，嗰時覺得幾好玩！

記：你喺喜劇《晨早兜巴星》同前輩夏里遜福及戴安姬頓過招，感覺如何？

麗：夏里遜福嘅幽默感好強，知道點做先令人發笑！戴安願意試新事物，而且成日走在尖端，勁有啟發性！

適度保護私生活

記：雖然你參演過唔少大製作，不過未曾成為傳媒焦點，有咩睇法？

麗：其實要保持曝光率又唔想私生活被打擾，真係好難囉！要喺適當嘅時機露面令大眾對我感興趣，但亦要避免露面太多令人煩厭，其實我從未想過要出名或吸引大眾目光，不過因為大多數觀眾想知影星嘅華麗私生活，所以好多演員放工亦唔可以隱形！

記：你都想私生活隱形？

麗：我逼自己唔喺荷里活圈子太活躍，即使咁樣會令我失去某啲工作機會，就算令我唔可以成為妮歌潔曼咁出名，我都唔介意！

遺憾與賴恩甩拖

記：你同舊愛賴恩高斯寧合作嘅《忘了，忘不了》亦係經典，你有冇預計過咁成功？

麗：我同賴恩都估唔到！佢係一個好好嘅演員，我哋都好落力去投入角色，冇諗過觀眾話感動到喊，的確令我難以置信！

記：當然啦！因為當時你同賴恩撻着嘛！不過，當你哋分手之後，好多少女幻想都破碎！

麗：係呀！我哋唔能夠好似戲中咁永遠快樂生活下去，令大家失望！不過呢種都算係讚美，因為喺兩個鐘嘅電影，已經咁有感染力！

記：你喺荷里活有好多加拿大同鄉，好似賴恩雷諾士同薛夫洛根，識唔識佢哋？

麗：薛夫係加拿大人咩？唔好話佢知我唔知喎！除咗賴恩，我仲識Michael Cera同Alanis Morissette！我哋喺7月1日會喺洛杉磯聚會慶祝加拿大國慶，會有煙花同慶祝活動。