趙哲妤歧路蛻變

模界新貴趙哲妤由選美界踩入Model界，擁33C驕人上圍的她即將推出處女寫真。她求學時一度迷失自我，幸好變回乖學生，孜孜不倦的她正攻讀第二個學士學位，誓要做個美貌與智慧並重的女模！

今年23歲的趙哲妤（Uny）去年參加《2010中國小姐大賽》成為香港區五料冠軍，年初再於總決賽奪季而還，挾着選美佳麗美譽的她將加入今年的寫真戰，大騷33C天賦本錢！她笑言當初參選中國小姐純屬美麗誤會：「有朋友報名，我以為佢參選，原來係幫我報名，半推半就就參加咗！」她坦言因有Part-time模特兒經驗，在台上毫不怯場：「唔驚！都算幾輕鬆咁攞咗五料冠軍。」

提起模特兒，普羅大眾除賦予靚、高挑、身材好等正面評價外，亦會附送「冇腦」、「得個殼」等負面形容詞！模界新貴Uny銳意擺脫這些負面框框，努力攻讀學士學位，誓要成為有殼又有餡的模特兒：「我讀緊Part-time新聞系學位，今年畢業，係我第二個學士學位，之前讀Business Management。騷身材搵錢唔捱得耐，要畀人睇到有內在美，唔係得外表！」身為麵包癡的她透露有意在畢業後開舖圓老闆夢：「我好鍾意食麵包，自己都識整！依家儲錢都儲得七七八八，希望舖頭賣一隻叫Uny嘅麵包。」

迷途知返 參加選美

Uny出生小康之家，母親是事業女性，對這朵溫室小花管教甚嚴，她說：「唔准出街，睇電視要限時，到中一都要工人接返放學，幾誇張！」不過乖乖女都有反叛期，她讀中二時誤交壞朋友，令家人大為緊張：「媽咪發現我變壞，即刻幫我轉校。我去咗珠海讀國際學校，同啲同學唔熟，惟有專心讀書，變咗好鍾意讀書，成日考第一！」

傳統父母覺得讀書大過天，Uny的父母亦一樣，起初不支持她做Part-time Model：「佢哋想我讀好書先，其實選美都係臨出鏡前先同屋企講，佢哋竟然幾支持我！一嚟我已經大個女，佢哋覺得我有自主權去做想做嘅事，二嚟選美好有意義，係慈善活動，所以屋企人嘅反應都幾正面！」Uny在家中排中間，有家姐及細妹，身為「中間人」的她不覺被忽視：「做中間嗰個幾好吖！有家姐錫，又有細妹畀我錫，我學識中庸之道！」她透露家姐是香港手球代表隊，自己則是選美香港代表，兩人同樣為港爭光！

靚女的感情生活總是備受關注，問到Uny是否有另一半？，她說：「現階段以工作為重，當然女仔對愛情都有憧憬，自己亦打算會生BB。以前諗過24歲結婚，依家23歲都嫁唔出！但係人大咗諗嘢長遠咗，香港乜都貴，生係會生，但係都要努力工作先！惟有無限期押後計劃，依家工作都幾有成功感吖！」再追問有否拍拖，她傻笑並支吾以對，言下之意非常明顯！身為大學生的她揀「杯茶」要求「門當戶對」，她說：「要有事業，最好大學畢業啦！我鍾意成熟穩重型，最好大我五年以上，花仔相處唔到！（要靚仔？）都好，我鍾意靚仔！」

唔要低俗 玩味高貴

Uny今年將會推出寫真，問到以甚麼造型奪人「眼球」？她表示有意效法林莉去年寫真的噴漆元素：「我想走高貴同藝術感，展現到女性胴體美感！着住Top同短褲玩人體彩繪，又要顯得性感，我覺得比着Bikini難度更高！而且坐喺度幾粒鐘畫彩繪，對我嚟講係新挑戰！」現階段她與公司正考慮在香港及內地書商中二選一：「我知內地市場好大，可以幫我打開知名度，但我始終香港出世，喺香港打好基礎再踏入內地會好啲！」

後記：選美「後遺症」？

Uny表示參加中國小姐獲益良多，禮儀課堂讓她變得斯文高貴，使她說話時有種「選美腔」：「我本身性格好女仔，講嘢陰聲細氣，選美前朋友已經覺得我講嘢好有選美Feel。之前拍《毒禍2》做大家姐，自己講嘢太細聲唔襯個角色，要學識粗聲粗氣啲，對我嚟講係幾大挑戰！」