趙碩之數臭拍檔遭杯葛

今年要發力谷胸出寫真的趙碩之，最近拍攝亞視劇集《親密損友》竟傳出遭同劇演員齊齊杯葛，有傳令她慘成「獨孤精」的原因全因「三宗罪」：1.向高層打小報告、2.導演上身教做戲、3.肆意講「波」經。

向來惹火的趙碩之（Wylie），有傳最近因「三宗罪」而被亞視劇集《親密損友》演員關楚耀、呂晶晶及趙彤等杯葛！

罪狀一：據知，Wylie拍攝《親》劇時經常導演上身，教飾演其前夫的關楚耀如何企位及做戲外，令劇中演員及劇組「眼火爆」。

罪狀二：不用埋位時，Wylie又大肆講「波」經，多番強調自己的Big爆身材「純天然」，晒命之舉令人反感！加上Wylie取笑現任經理人戴夢夢恨出碟做歌手及不甘心做幕後，令其他演員對其「口德」更添劣評。

罪狀三：雖然Wylie表面上跟拍檔有講有笑，但據悉她因深知不受歡迎，遂向亞視執行董事盛品儒打小報告，令一眾演員關係變差。

對於Wylie被指因「三宗罪」而慘遭杯葛？同劇的呂晶晶雖然不覺得，但問到Wylie有否導演上身教做戲？晶晶語帶雙關地說︰「我哋係有商有量，教企位呢啲係導演做。」

趙彤「爆粗」被恥笑

另一演員趙彤接受電話訪問時則說︰「吓？有啲咁嘅事咩？（佢指點你企位？）我係新人，提點個個都有，我廣東話唔好，講成粗口經常畀人笑！（Wylie有冇笑你？）個個都有！佢係其中一個！」再追問集體杯葛Wylie一事，她即改口說︰「唔知！我同佢多戲啲，有冇畀男方杯葛真係唔知！」

至於捲入杯葛風波的Wylie，因在飛往美國登台途中而未有回應，其經理人戴夢夢揚言不相信Wylie暗寸她「不甘心」︰「傳聞唔緊要，人哋有人哋講！」問到Wylie遭杯葛一事？夢夢愕然的說︰「吓？做乜傳啲咁嘅嘢？我唔信其他演員杯葛佢，我有問佢拍劇拍得開唔開心，佢話好開心，冇乜特別。」