Soler險遭爆樽嚇餐死

孖仔樂隊Soler出道時，特別喜愛在酒吧演出！提到酒吧騷的點滴，他們異口同聲說：「有次差啲畀個飲大咗嘅人爆樽！真係嚇餐死！」

孖仔樂隊Soler兄弟將於明日在中環酒吧開騷，他們坦言最喜歡酒吧的氣氛，但透露曾在酒吧「出事」：「有次喺內地，有個客唔知咩事，一開始已經好嬲咁望住我哋，之後仲揸住個酒樽好似想衝上台爆我哋咁！（最後有冇事？）好彩佢啲Friend捉住咗佢，真係嚇餐死！（咁有冇試過畀人衝上台錫？）有呀！耐唔耐就有啲男人衝上台攬住我哋錫，哈哈！」

他們自爆完成酒吧騷後將與台灣樂壇前輩羅大佑到內地巡演，其後也會到台灣及東南亞工作，實行四出搵真銀！他們說：「其實近期仲完成咗兩套戲，第一套係台灣嘅《痞子英雄》，做大反派殺手，所以學咗好多武術動作。另外就係陳奕迅、蘇永康都有份嘅笑片，劉鎮偉做導演，（你哋形象唔似喜劇演員！）導演好叻搞笑，好識帶我哋，所以都做得好順利。」

大孖有「拖」冇結

提到感情生活，細孖Dino說：「我結咗婚，都好穩定，不過未諗生BB，想做吓嘢先！」而大孖Julio則表示還在享受拍拖過程：「我同女朋友感情好好，（幾時結婚？）未諗呀！」他倆均表示以工作為先，未來幾年都係搏命搵錢。

文：音樂組