阿佘女版阿旺浮誇遭圍插

視后佘詩曼為求突破，在新劇中演智障人士，惟外界反應毀譽參半，演技捱批，被指造作及模仿「女版阿旺」，似足「花瓶」，令她爭奪今年視后出現暗湧，該劇更被指侮辱智障人士！

已離無綫北上外闖的佘詩曼，在剛播出的無綫新劇《花花世界花家姐》中飾演智障人士「花家姐」，難度甚高，相當考演技，令她有機會憑《花》劇問鼎今年視后寶座，惟劇集播出以來，外界反應好壞參半，令其視后之路添變數！

無綫廣管局接投訴

無綫接獲兩宗投訴，指阿佘不適合演弱智人士，以及扮郭晉安在《阿旺新傳》中的「阿旺」，廣管局亦接獲投訴，指《花》劇演員以劫匪打扮到銀行提款，教壞小朋友。而網民在討論區也議論紛紛，有網友斥無綫侮辱智障人士，認為劇集內容誇大，令智障人士看後不開心；同時他們指「女版阿旺」欠新意，更批評阿佘演技作狀，但亦有視迷撐阿佘，指她將角色拿捏準繩。

本報記者致電勵智協進會，負責人陳小姐表示有留意《花》劇：「我做咗20幾年義工，好清楚智障人士由細到大嘅變化，我有睇佢演出，但行為唔似，完全唔係嗰回事，佢好似一個『花瓶』。（智障人士家長有冇批評？）唔係太多，不過家長覺得阿佘好造作，我覺得佢冇研究過智障人士嘅內心同日常生活情況，演得好浮誇！」

阿佘昨日宣傳電影《人約離婚後》，對於被指模仿「女版阿旺」，她說：「拍嗰陣不斷有人咁問，但都冇計，觀眾先入為主，大家耐心啲睇。（唔抵？）冇！收視都OK，最緊要有話題。」問到有否參考「阿旺」揣摩角色？她說：「嗰時我拍緊戲，冇睇套劇，正式收到《花》劇本時，自己都驚模仿，所以冇睇到。（點揣摩？）有去過智障學校觀察過。」另外，她透露在《人》片中有大膽演出，她說：「喺戲中同方力申同羅仲謙有少少關係。（床戲？）對自己嚟講算係大膽，不過大膽係個地方，但唔講得。」

此外，阿佘日前接受ontv《娛樂on Show》訪問時表示，飾演「女版阿旺」是個突破：「角色幾難做，睇咗太多方法，有十幾種方法但又唔可以溝埋，只可以揀一、兩種，我有選擇困難症，唔知邊個係最好。」

林峯力撐劇集正面

至於《花》劇男主角林峯在劇中的對白及情節涉歧視智障人士，劇中他向飾演阿佘妹妹的梁靖琪投訴：「我掂過佢（阿佘）都要用消毒藥水洗手，麻煩你唔好再叫你家姐出嚟！鎖住佢啦！影響市容，搞到我食唔落飯。」林峯接受電話訪問時澄清：「對白有好多灰色地帶，大家都好小心處理，套劇係為智障人士平反，雖然阿佘喺劇中智商有問題，但佢仍可以融入社會，喺Office工作，唔係輕視及睇小佢哋，劇情去到最後會好Warm。」