Twins出道十年 阿嬌面腫變童顏

昨日是Twins入行十周年的大日子，英皇特別為蔡卓妍（阿Sa）和鍾欣桐（阿嬌）舉行記者會宣布連串慶祝大計，阿嬌因剝智慧齒致右邊面連頸「爆腫」示人。

為慶祝Twins出道十周年，昨日阿Sa和阿嬌在深圳舉行《Twins 3650十周年慶典》記者會，近百歌迷到場支持，場外更展出Twins不同年代的經典造型照，歌迷紛紛拍照留念。席上公布Twins十年來在樂壇上的功績，並播出早前到澳洲拍寫真集的花絮，兩人還勁歌熱舞演唱新歌《3650》。對於Twins經歷十個年頭，阿Sa表示就如昨日發生一樣，對於阿嬌粉面腫脹，她笑說：「就好似返番以前（Baby-fat）咁！」

慘變「鴛鴦面」的阿嬌，原來前兩天剝智慧齒：「智慧齒四隻腳都歪晒，掹嗰時我要按住條頸，三日都未退到腫！」阿Sa搞鬼地說：「用棉花塞埋另一邊面，咁咪平衡囉！」愛靚的阿嬌以長髮遮面，拍照時亦要用手托着面頰！至於十周年的慶祝活動包括推出國語專輯和寫真集，以及舉行世界巡迴演唱，到美加、星馬各地表演，還有八月在會展舉行一場音樂會。

微博粉絲破七百萬

另一方面，Twins在會上宣布騰訊微博在兩星期內的跟隨人數達到六百萬，而至截稿時已衝破七百萬，相當厲害！提到曾與騰訊老闆鬧緋聞時，阿Sa說：「吓？真係唔識佢，唔講我都唔記得！」問到阿嬌日前在微博與內地藝人因行善而發生罵戰？她說：「網上好多說話都唔負責任，所以唔回應喇！」