Chilam靚靚睇狗氹魔童

眾所周知張智霖（Chilam）與袁詠儀一直恨生B女，不過早前靚靚卻自爆甲狀腺有問題影響生育大計！忙完演唱會的Chilam眼見老婆身體有事，即急急回家照顧，日前更帶囝囝張慕童（暱稱魔童）到銅鑼灣睇狗仔，一享天倫之樂。

袁詠儀（靚靚）由影壇烈女變成慈母，誓要全心全意做個好媽媽，曾揚言有一仔一女才是人生一大樂事的她，一直恨生多個女湊個「好」字，不過屬於高齡產婦的她，生BB恍如同時間競賽，為了休養身體一擊即中生多個，她一度全面停工全力造人，可惜久久亦沒有喜訊，她早前更表示身體有事影響生BB計劃。

近年事業順風順水的Chilam早前於個唱上公開對靚靚剖白愛的宣言，令人羨慕。他完成個唱後，為免冷落抱病的嬌妻，早前與靚靚帶魔童出巡銅鑼灣過家庭日。Chilam抱魔童下車，並走進一間寵物店，靚靚則緊隨其後。

魔童好興奮

魔童進店後即相當興奮，不僅動作多多，於店內指手畫腳，見到狗仔後又扮鬼臉氹狗仔，更邊扯着靚靚邊指着狗仔，似向靚媽撒嬌要買來飼養。不過眼見魔童年紀小，自己身體又抱恙，寵愛囝囝的靚靚惟有忍痛拒絕。經過一輪與狗同樂後，Chilam與靚靚帶魔童離開並返回座駕。期間當記者拍照時，他們大方任影，當靚靚安頓好坐在後座的魔童後，Chilam便開車直返寓所。

伸脷扮鬼臉

事隔幾日，Chilam與靚靚分別出席活動後在鬧市出現，只見Chilam路過銅鑼灣時，健步如飛，相信正趕回家與靚靚及魔童享家庭樂。至於靚靚則出巡中環，見記者拍照時，她更學囝囝扮鬼臉伸脷，恍如餅印一樣﹗