超盈婚前飯局 賭王笑開眉

爭產風波結束後一直深居簡出的賭王何鴻燊，前晚在四房陪同下到銅鑼灣歎意大利菜，超盈男友Greg以未來女婿身份現身，又協助四太打點，一家樂也融融，難怪賭王胃口大開，食足兩粒鐘！

正所謂「家和萬事興」，擾攘多時的何家分產風波終達成共識，和平落幕。事件結束後兩個月來，賭王僅透過女兒的微博現身，至前晚才公開露面。前晚7時許，他在四太梁安琪、女兒何超欣、何超盈及其男友Greg陪同下，到銅鑼灣開平道的da Domenico歎貴價意大利菜，期間胃口大好，由頭食到落尾！

精靈打招呼

晚上9時許，食飽飽的賭王在眾人陪同下離開餐廳，登上座駕返回大宅。現場所見，久未露面的他精神奕奕，看見記者即主動微微舉手打招呼，並對鏡頭微笑，非常精靈！一直陪伴在側的四太，則緊張地叮囑保鏢小心安頓賭王上車，而一直被視為未來女婿的Greg亦十分識做，從旁協助四太打點！眼見Greg與乖女超盈感情穩定，又如此細心識大體，難怪賭王心情大靚，而四太亦Keep住四萬咁口！記者上前問四太是否為賭王提早慶祝父親節，她笑笑口說：「冇咁早，今晚普通食飯啫！」說畢即登車離去。

記者昨日致電超盈，問到是否即將與Greg拉埋天窗，故安排他與家人食飯，她說：「完全唔係，佢同我屋企人好熟o架喇！我哋成日一齊食飯。（畢業之後就結婚？）結婚個個都想，但我仲細，遲啲再算。」談及賭王的身體狀況，她說：「Daddy身體好好，你哋見佢出嚟就知啦！我最近忙緊讀書，啱啱先考完試，係陪Daddy先出嚟，嚟緊暑假都會留喺香港陪Daddy。」