祖兒心郁外闖拓版圖
容祖兒、林峯、林欣彤、鍾舒漫與洪卓立等，前晚冒雨出席《第三屆全港運動會開幕典禮》，祖兒說：「可能大會睇中我有活力，搵我唱主題曲。（好友何韻詩入圍台灣金曲獎？）真係唔容易，恭喜晒！（送禮賀佢？）之前佢生日我都未送，遲啲夾埋送份大嘅！（你想提名金曲獎？）我喺香港站穩陣腳，公司、屋企人同朋友都想我出外發展，去外面吸收新嘢。」
至於獨享車出車入禮遇的林峯，否認耍大牌：「係大會安排，可能我唱Closing，嚟到冇晒車位。（無綫急調你套《回到三國》做台慶劇，畀你上位攞視帝？）唔會囉！個劇有好多後期要做，一定趕唔切。（恨唔恨攞視帝？）順其自然，冇人唔想攞獎。」
而林欣彤則擔心因緋聞太多而被封「集郵女星」，她說：「我都唔知成班人食飯，點解會傳我同謝東閔有緋聞，依家我接近邊個，邊個就變咗我嘅緋聞，男仔都驚咗我呀！」
冒雨演出的祖兒，狀態依然Good Fit！
緋聞一單接一單，令林欣彤大嗌怕怕！
獲「厚待」乘保母車出入會場的林峯，落車時格外風騷。