王君馨守得雲開

挾港姐亞軍之名入行的王君馨恨急上位做一線花旦，奈何經過近四年的時間洗禮，令她明白踏實的重要，一直默默耕耘，終於守得雲開上位有期，昔日的壯志屆收成時。

無綫近日爆發離巢潮，小生花旦紛紛發力爭上位，王君馨（Grace）亦不執輸，最近以酷爆美女臥底角色殺出另一條血路，總算突圍成功。除此之外，Grace還連續接拍《飛虎》及《紫禁驚雷》劇集，甚至夥拍一線花旦胡杏兒及鍾嘉欣等日夜為《樂府藏龍》練舞。不講不知，原來她曾「奢望」火速上位：「拎到港姐亞軍後一、兩年都希望做到女主角，同一線男藝員做到對手戲。」想不到四年後才有曙光。

記得選美翌年，Grace被派出征內地的跳舞比賽《舞動奇迹》，最終奪冠凱旋而歸。不過，「舞后」虛名讓她能在台慶及慈善騷中擔大旗演出，但未有助她贏得更多劇集演出的機會，加上主持飲食節目被狠批浮誇，觀眾緣大減，事業自然停滯不前，Grace坦言曾一度感迷失：「當時唔開心，愈諗就愈覺得自己冇能力控制，想做一線唔係想做就做。」幸得主的指引，教會弟兄姊妹的疼錫，加上從天災人禍中得到反思，令她學懂放下，放棄過分追求物質生活，珍惜與家人及朋友的相處。

謝絕靠黐高層上位

現在的Grace對「上位」不以為然，不覺得要劇接劇才能反映上位指數：「上位要睇天時地利人和，唔好向住一個目標，要享受整個過程，開懷後慢慢得到觀眾緣，監製同樂易玲小姐對我嘅實力有信心，覺得我處理到某類角色就會畀機會我，喺呢個圈唔知有幾長時間，所以要一部一部戲咁享受。」黐高層、搞是非及緋聞等上位招數萬試萬靈，但她大唱反調：「唔係成日見到樂小姐，佢太忙！一個女人要照顧家人之餘，再睇埋幾百個藝員，係一盤好大嘅數，係唔係畀人捧都只係外界點睇。至於是非同緋聞，我明白香港傳媒要呢啲，但我唔會刻意做出嚟，因為咁係講大話好危險，唔值得，都係要靠實力。」

凡事講實力的Grace除了落力拍劇累積經驗外，還對公司忠心耿耿，從未想過離開娘家向外闖，她強硬地說：「我享受TVB生活！唔係只係拍劇，拍飲食節目對我嚟講係開心同舒服，我仲可以鍛煉中文！有邊個唔想拍劇，又可以做綜藝節目，又有出邊嘅登台工作？我覺得自己仲好新，公司畀咁多機會我，已經好錫我。」面對陳鍵鋒及佘詩曼等相繼離巢北上發展，Grace卻未受神州的強勁掘金力動搖，更極力維護公司被插人工奀的傳聞：「大公司對個個藝員都好照顧，雖然未必人工超好，但人哋喺出邊都有危機！捧人都先要有筆錢，工作係為還錢，幾年後先真係賺到錢，但依家我起碼唔會欠公司錢。」

努力工作目標買樓

Grace踏實地工作賺錢，雖然不為買名牌，但活在當下，如大部分升斗市民一樣為蝸居而奔波勞碌，她說：「希望不久將來買到樓，但未搵到一區適合長住，唔鍾意太嘈，但搬得遠揸車又好危險，所以到依家都未有心水。」買樓是長遠目標，短期目標則是想一家人開心地旅行大玩特玩，問到想建立屬於自己與另一半的小家庭？Grace呻難覓男友：「圈中人好難識，因為好少機會單獨相處，怕畀人影、畀人跟，圈外人又好少接觸。」眼見李亞男及王祖藍經教會撮合，她亦有意在教會尋覓另一半：「都會搵基督徒，因為信仰一致，咁佢會明白我嘅思想，圈中人或者圈外都可以。」

後記：笑放正能量

Grace無論面對面說話還是發短訊，總愛加送「哈哈」笑臉，加上代表熱情如火的紅髮，讓人感受到其發自內心的正能量！