鍾舒漫捱眼瞓揞名開舖

鍾舒漫希望今年內開設DIY品牌公司，「升呢」做老闆娘兼設計師，但她擔心被名氣所累，寧願「隱姓埋名」做生意！

今年才買樓上車一嘗業主滋味的鍾舒漫（Sherman），雖然供樓壓力大，但雄心萬丈的她近日再蠢蠢欲動，打算投資做生意，望於本年底成立DIY自家品牌公司：「我好鍾意設計時裝、飾物、鞋，甚至日用品，我啲設計好多同事都讚獨一無二，又靚又實用，我覺得係一條財路，真係有得做！」

問到何時開始愛上DIY？Sherman表示全賴母親自幼薰陶：「媽咪係縫紉高手，我細個啲衫全部都係阿媽用衣車車嘅！」她透露現時出Trip用的袋亦是出自媽咪之手，並大讚：「媽媽自己車嗰啲嘢比市面嗰個實用好多，又好靚！」她直言同事經常嘲笑她為車衫捱更抵夜，自討苦吃，但Sherman全不介意：「我車出嚟啲衫個個都讚靚！當佢哋問我喺邊度買嗰陣，嗰份滿足感完全可以抵銷捱眼瞓嘅辛苦，其實做自己鍾意做嘅嘢，係唔會覺得辛苦o架！」

保證DIY靚貨

問到打算在哪一區開舖？Sherman不諱言地舖租金太貴，難以達至收支平衡，故只考慮寄賣或網上招攬生意，但保證所有作品均是由她親手縫製，絕不假手於人。至於品牌名稱，她說：「我一定會用一個特別嘅名，但一定唔會用『鍾舒漫』囉！因為我怕啲人係為支持我而幫襯，而唔係因為欣賞我啲作品！」