梁靖琪敖嘉年 擦出愛火花

擁有鬼妹仔性格的梁靖琪，在新劇中與敖嘉年首次拍檔演戀人，為了更加合拍，她主動出擊打開話題，最終把嘉年這座「冰山」劈開，更成為密友！

梁靖琪（Toby）與敖嘉年於劇集《花花世界花家姐》中飾演一對鬥氣冤家，訪問期間，Toby賣口乖表示心裏有一份希望合作藝人的清單，而嘉年名列三甲，因此很高興能與他合作：「本來我哋之前有機會合作，但要做手術錯過咗，好在今次有機會！呢段時間我喺佢身上學到嘢o架！仲Friend埋添！」Toby坦言在嘉年引領下，每次開工都很容易投入角色：「我平時講英文多，講嘢冇咁多聲調，嘉年會提我聲音都可以感動觀眾，令我留意咗！」

為了令拍攝時彼此更有默契，Toby主動行出一步，逗害羞的嘉年傾偈。Toby指嘉年除了埋位外，大部分時間都戴上耳機聽音樂，故難有交流機會，她惟有想盡辦法打開話題：「我哋演情侶，之前唔溝通點得？所以有次喺外景車我專登坐佢隔籬，咩都講一餐，傾傾吓佢又OK喎！好快就熟落咗！」在旁的嘉年自言向來怕醜，加上怕被誤會，故甚少主動認識別人，不過今次與Toby一拍即合，合作得相當愉快！

齊齊聽情歌

另一方面，雖然二人於劇中不乏親熱戲，但未有向另一半報備，更挑選一些情歌，作為他倆愛的主題曲，每當有重要感情戲時，都會聽這些情歌來投入角色，Toby說：「呢個方法好Work！真係好投入角色，有次陳山聰經過，都笑我哋使唔使咁Sweet，即係成功啦！」