糖妹匿名寫Blog書發少女心事

人氣爆燈的組合糖兄妹在音樂上「夾到漏油」，但閒時活動卻非常不同！糖妹較靜愛睇書及寫Blog抒發心事，糖兄則偏愛泰拳發洩。

宅男女神糖妹（黃山怡）外表活潑好動，但她自爆很喜歡到旺角的樓上書店買書，亦有靜態一面。問到喜愛的書籍類型，她說：「好鍾意睇減肥書、心理書同食譜，因為可以增值自己，另外我又鍾意寫日記，以前會寫Xanga，依家就轉去第二度寫Blog，但唔會畀人知係我，淨係想抒發吓心事，好有效！」

糖妹又坦言愛看科幻電影，近日最愛《雷神奇俠》：「我特登睇埋字幕之後嘅片段呀！講所有英雄聯手，好正呀！」她平時也愛到影碟舖租碟，的確非常熱愛電影！

糖兄愛打拳發洩

至於糖兄（阿峰）自言近日愛上打泰拳：「因為想減肥，又希望自己意志力強啲、Man啲！（怕受傷影響玩樂器？）有次教練叫我做十下引體上升，我淨係做到五下，之後隻手用唔到力，但都要頂住。（唔玩啲唔會影響隻手嘅運動？）因為泰拳硬啲，可以練反應，比較實際，而且我哋唔會打到K.O.（擊倒），又唔會正式比賽，其實好安全。（紓緩壓力？）好紓緩工作壓力，我成日會大叫『死啦』咁打！」