蔡少芬開刀誕9磅4巨B女

挺着巨肚的蔡少芬（Ada）前日下午開刀誕下9磅4安士的巨B女，張晉為女兒取名「楚兒」，希望她清楚了解上帝的真理，而英文名則為「Zoe」代表生命意義，兩公婆榮升父母喜極而泣！

文：影視組

預產期原定本月17日的Ada，前日陣痛提早6日到山頂嘉諾撒醫院待產，一輪催生後，在醫生建議下開刀分娩，BB女於前日5月11日下午5時11分出世，重9磅4安士，取名「張楚兒」。由於巨B女的手腳都很粗壯又不常喊，被形容為很Tough（堅強）的女孩。雖然Ada想自然分娩親身感受分娩過程，可惜事與願違，但她亦十分感恩。而陪產的老公張晉大感做媽媽並不容易，會更加愛錫老婆，剛為人父的他望着女兒更是開心到笑不攏嘴，還在微博上公開一家三口的幸福照片！

昨午約5時半，張晉到醫院樓下接受訪問，期間他豎起拇指及合十鞠躬，表現出剛為人父的興奮：「多謝關心！母女平安，BB女出咗世啦！佢預產期係5月17號，之前周刊都寫錯晒，我見佢個肚咁大咪尋日入院催生，好巧合，最後BB女喺5月11日5點11分出世，BB女重9磅4安士，相信係全醫院最重嘅BB！（女兒似邊個？）嘴似爸爸，頭髮就似媽媽又有美人啄。（改咩名？）Ada想改單字，我就想要個『楚』字，因為要BB女清楚了解上帝嘅真理，最後名為『楚兒』，而英文名就叫Zoe，代表生命意義。」

榮升外婆的蔡媽媽已到醫院探望Ada，問到雙方家長是否已到院探望？張晉說：「應該嚟嘅都嚟晒！未有咁快出院，我都未有咁快開工，陪吓老婆先。（Ada做家庭主婦？）佢唔可以安定落嚟o架!等佢休養後，估計會出嚟拍嘢！」

張家輝爆成個餅印

一眾好友先後到醫院探望，昨晚7時許張家輝到醫院探Ada母女：「可能啱啱出世，BB女同阿媽一個餅印。（教湊女心得？）之前傾過。（送咩？）遲啲先，等佢出院先！」而陳法蓉則自爆感動到喊：「係開心、緊張、感動同好攰，BB非常得意，真人比上鏡靚一百倍，祝BB快高長大又靚女！」而韓馬利昨晨前往探望：「BB女好健康、好得意！阿晉笑到個口合唔埋。」謝寧透露今天離港回來才探望及送上神秘禮物。