詩雅學藝冧狗博做Boss

有「翻版大S」之稱的詩雅，雖然盛傳有個從事珠寶業的緋聞男友，但向來喜歡自我增值的她，日前獨自到九龍塘學寵物美容！當日她慳妹上身搭港鐵、捱麵包，原來她密謀開寵物店做老闆，靠自己做女強人！

近年片約不斷的詩雅，雖然成為影壇新寵，加上盛傳與珠寶富商Kenneth打得火熱，理應可以豪使豪買，不過她實情是慳妹一族！日前，薄施脂粉的她未有乘坐保母車，反而戴着鴨舌帽逼港鐵到九龍塘，其後到平民價麵包舖買麵包醫肚，再到便利店打書釘，睇雜誌睇足10分鐘，最後徒步到附近的唐樓，全程只是花了幾蚊，盡顯慳妹本色！

吹毛毛洗白白

原來詩雅在唐樓學寵物美容，據知她經常抽空進修自我增值，上堂期間亦相當認真。甫到達學校，她即換上制服到「班房」上堂，學校安排狗狗予學員練習，向來愛心爆棚的她，一來即熱情抱抱當日的拍檔「模狗」，又與牠傾偈溝通，試圖用愛心冧掂牠，認真識做！

詩雅在導師一對一的指導下，嘗試幫狗狗梳毛及洗白白，見她非常熟手絕冇「走狗」。洗白白期間，她更落手落腳為狗狗抹眼屎及清潔肛門腺，難得狗狗非常受落乖乖任由擺布，更不時露出一副冧樣，氹得詩雅笑逐顏開！最後她幫狗狗吹毛，雖然仍是學徒身份，但全程看來有板有眼，似乎離學成之日不遠！

「唔使下下靠人」

事後，詩雅接受電話訪問時謙稱並非特別慳儉：「其實我依家計劃緊開寵物店，所以去學寵物美容，仲要努力儲錢！不過我閒時唔係工作，都會搭港鐵、搭巴士，而且火車站同學校咁近，行過去都好快啫！」她透露一向有養狗，而且很喜歡小動物，因此選擇學寵物美容：「平時唔使做嘢，又唔想浪費時間，所以揀啲有興趣嘅嘢學！如果真係開得成寵物店，都要識呢啲基本嘢，唔可以下下靠晒人o架嘛！」