寶珠姐興奮到彈起

陳寶珠昨日娶新抱，見證兒子楊天經讀誓詞時，榮升奶奶的她緊張到心急企起身，又感動落淚。

現年36歲的楊天經與38歲圈外人吳文珊昨日於紅棉路婚姻登記處註冊行禮，明年才擺喜酒。一對新人以簡單禮服到場，雙方家長、寶珠妹妹陳寶儀及女兒羅苡之等親友到賀，而妹夫羅樂林則因開工未能出席。寶珠半百名戲迷則在場夾道歡迎一對新人。

據知，當註冊官着新人起立時，寶珠姐緊張得一同站起來，聞兒子宣讀誓詞時更感動到喊。一對新人禮成後齊齊咀寶珠姐，天經又與老婆咀嘴，場面溫馨。談到行禮時緊張得笑容欠奉，天經笑說：「驚讀錯誓詞。（生BB？）慢慢嚟！（點樣求婚？）我哋拍拖三年，過程好簡單，只係送戒指，冇跪地、冇送花，我哋講心！」新娘則大讚奶奶易相處。

畀新抱滿分

寶珠姐透露送了一對錶及金器等給兒子及新抱，問到有否家傳之寶，她說：「我咪寶囉！呢個新抱我畀滿分，做奶奶我唔會『敦』起個款。依家多咗個女，但都唔知頭先啲眼淚喺邊度出嚟！（天經話婚後一齊住？）佢哋二人世界，我好識做。」