Macy女人三十隨緣

有人話「女人三十爛茶渣」，女士過了三十歲，已隨時被封「中女」！不過，陳美詩卻笑談女人三十，她自言愛情與事業均在萌芽階段，堅信命運自有安排，無論做人老婆或爭上一線，統統隨遇而安！

近期娛樂圈頻傳喜訊，不少圈中情侶圴被追問婚期，與孫耀威拍拖兩年多的陳美詩（Macy），今年踏入三十大關，對不少女生來說，已到「三十歲前結婚」的盡頭，但身為基督徒的她堅信神會安排，她甜絲絲說︰「我將呢啲嘢交咗畀神，因為有好多嘢要雙方配合，係兩個人嘅事，仲有大家嘅屋企人。而且大家都係藝人，要有時間去諗都係一個好重要嘅因素。」

無意做少奶

正所謂「皇帝唔急太監急」，Macy默默等待婚期，但其家人難免心急，Macy笑說︰「其實催唔催婚都係咁o架啦！以前後生嗰時，屋企人的確有催，但依家就冇乜喇！」問到是否恨嫁，她說：「只可以答你四個字『隨遇而安』，大家冇特別計劃過，可能係下個月都唔定，真係唔知。」唯一肯定的是，她堅拒做少奶奶，婚後仍想擁有自己的事業︰「我唔做嘢會發霉o架！可能會做少啲，又或者冇乜轉變呢！」

唱歌出身的Macy，多年來事業轉變甚大，她說：「做歌手嗰陣已經係拍戲為主，因為我好鍾意做戲。入行前做Model時，已經有人搵我拍MV同短片，拍戲對我嚟講唔陌生。」由組合「女生宿舍」成員到單飛發展，繼而拍戲及拍劇，Macy未有因事業起跌而放棄，還向「視后」這個目標出發，她說︰「我好想成為全能藝員，演咩角色都得到認同，因為覺得咁樣好勁！」

唔抗拒外闖

談及無綫的離巢潮，Macy淡然說︰「TVB有好多人，藝員有一千幾百個，有人走有人加入，呢啲係正常事，如果佢哋出面搵到更好嘅工作機會係好事，會祝福佢哋。」問到會否趁機博上位，她說︰「機會多咗？唔可以咁講，只係努力去做嘢，只要得到好成績，觀眾鍾意自己嘅話，就會多機會o架啦！」不過，她坦言外闖未嘗不是好事：「有邊個唔想搵多啲錢？其實入TVB前，我嘅第一套劇就係內地劇，所以對喺內地拍劇唔陌生，亦唔抗拒，如果公司安排我上去拍劇，係一個好好嘅機會。」她不忘向無綫賣口乖︰「不過我一日仲喺TVB，都會盡力做好自己，上唔上到位或者紅唔紅，呢啲冇得強求！」

上位與否對Macy來說輕於鴻毛，跟愛情觀一樣，她同樣選擇隨遇而安，若要用四個字形容自己的事業，她說：「多姿多采！香港做Production嘅劇唔多，大部分都係TVB，所以依家係好好嘅磨練機會。我做過好多唔同類型嘅角色，好似喺《與敵同行》好柔弱，喺《古靈精探B》就演少女，而今次《洪武三十二》就演打女，都係一個新挑戰！能夠試到唔同嘅嘢，我覺得好開心，因為我鍾意做戲！」

後記︰步步驚心

訪問當日在街外取景，穿上4吋高踭鞋的Macy跟着攝影師四圍走，當她行落一條「長命斜」時，小記見她步步為營，於是在旁協助，她笑說︰「真係好斜，我唔會碌落去啩？」未知孫耀威知道會否心痛呢？