名模琦琦前晚出席好友鄭兆康生日會時透露，明天會在南京工作，老公任達華在四川拍戲，女兒則留港，一家三口分開過母親節。她說：「今個母親節會清靜啲，冇特別，個女未送禮物，但日日都係母親節，平時會送Kiss或者畫畫畀我，我之前都送咗珠寶畀媽咪。老公成日送嘢畀我，現金、珠寶咩都有。」她續表示稍後要到三藩市工作，又認為拉登之死恍如引爆炸彈，擔心會有恐襲，但直言信主會獲保佑。
琦琦與華哥各有工作在身，明天將不會與囡囡慶祝母親節。
（資料圖片）
