蔡少芬「失蹤」 炮製雙囍母親節

明日母親節，初為人母的2R成員黃婉君（Rosanne）及將為人母的蔡少芬，心情各有不同。Rosanne大談湊仔經；而熱衷微博的蔡少芬昨午起便玩「失蹤」，載有生BB「走佬袋」的座駕亦沒有泊在寓所，有Fans更期待她明天分娩，實行雙喜臨門！

蔡少芬（Ada）臨盆在即，身為「微博精」的她自昨午12時留言後，便再沒有發表生仔偉論，其寓所昨日亦杳無人煙，負責運送入院行李的座駕亦不在寓所範圍，加上Ada與老公張晉均沒有接聽電話，令人懷疑Ada已低調入醫院，準備小生命降臨。記者致電其經理人，對方只強調Ada尚未生得！

各方正等待Ada與張晉報喜之際，Ada的Fans似乎更加心急，昨晨於微博笑指，未知Ada的BB是否要堅持等到爸爸張晉生日（5月19日）才呱呱落地，亦有粉絲指明天便是母親節，希望BB明天出生，倍添雙重意義。

坐月期間睇學友

另一方面，上月15日為混血牙醫老公誕下愛兒白迅（Dylan）的新手媽咪Rosanne接受本報訪問，每當提起愛兒即甜絲絲說：「BB有差不多3個禮拜大，佢好易湊，老公有請假幫我湊，但做牙醫好費神，我驚佢返工時唔夠精神，就勸佢唔好，因為有陪月朝10晚6陪我，夜晚就由我同工人湊，等老公舒服啲！我湊仔好叻o架，好似乜都識！」

Rosanne自言餵母乳後，上圍更加巨無霸：「陪月講笑話我哋成家人都咁勁，我由32D升到34D，脹得嚟有啲痛，不過為咗BB冇辦法，惟有飲木瓜魚湯同番茄薯仔湯補一補！」坊間有指坐月期間禁沖涼，Rosanne即說：「唔得！我要埋身餵BB，點可以唔沖？我依家有Keep住用薑水洗頭同沖涼！」她又表示囝囝樣貌是她與老公的混合體，雙眼遺傳其大眼基因，其他部分則似老公，並說：「BB好鍾意放屁，有朋友抱佢時，佢突然放臭屁，哈哈！好尷尬！」

明天是母親節，Rosanne冧爆指老公已送了101支玫瑰給她，代表100%的愛及為他誕下第一個愛情結晶品，問到如何慶祝？她說：「老公好辛苦撲到學友演唱會飛，所以會同老公睇，我真係忍唔住講，我老公真係好Sweet！」