周永恒平價花招搞喊阿Yu

創作歌手周永恒（Roy）因與業主發生糾紛而萌搬屋念頭，日前他帶同妻女睇樓，順道買花、送糖、歎下午茶預祝母親節，雖然花費約200元，但已冧到太太趙頌茹（阿Yu）眼濕濕！

上月中，Roy與業主鬧不快，令他欲搬竇避是非，日前他偕阿Yu及七個月大的囡囡周信希到紅磡區睇樓。他們分別參觀面積400呎、約250萬，以及300呎、約190萬的單位，雖然面積較迷你，但勝在間格實用，而且有良好學校網，阿Yu喜歡有露台的單位，但Roy嫌地方較細，故向經紀表示需要時間考慮才決定。

餵老婆飲「奶」

睇樓後，阿Yu和囡囡又攰又餓，Roy遂提議到茶餐廳飲茶，途經樓下的殯儀館時，Roy獨自行向擺滿花牌的「花店」，但似乎找不到他想要的東西，故折返會合妻女。行了三條街，Roy抱着女兒，拖着太太到花店，原來他欲買花給阿Yu，但靚老婆竟嚷着買薰衣草，故Roy花近60元買下薰衣草及玫瑰花滿足太太，並在街頭獻花，令阿Yu笑到見牙唔見眼，感動到眼紅紅攬實老公！其後，Roy路過便利店時，又用30元買了一包棉花糖，由囡囡送給媽媽，令阿Yu開心到咀囡囡一啖！

兩公婆其後到茶餐廳揀卡位坐，細心的阿Yu為老公及囡囡抹手，進餐前先祈禱，Roy見阿Yu服侍周到，也遞上自己的凍奶茶「餵」妻，埋單約100元。他們食飽飽後又恩愛地拖住手離去，相當溫馨！記者上前採訪時，Roy說：「今年係太太慶祝第一年母親節，加上唔想佢為業主爭吵嘅事而煩，咪打算搬屋！啲花就我送畀佢，而糖糖就係囡囡送，要開心可以好簡單。」他表示租樓要仔細考慮，但為妻女將來，必定要加倍努力搵錢，笑到瞇晒眼的阿Yu則趁機撒嬌：「我出年要買鑽石。」