陳豪起勢追咖啡獻媺

「筍盤」陳豪為力追港姐冠軍陳茵媺（Aimee），不但「羅Sir」上身擰到頭都甩否認送咖啡給舊愛廖碧兒，更首度開腔直認追求Aimee，誓將舊情全數Delete，抱得Aimee歸！

與廖碧兒分手後被封為「絕世筍盤」的陳豪，最近因Aimee的出現再「撻行副偈」。陳豪昨日到九龍灣宣傳新劇《點解阿Sir係阿Sir》時，未知是否因廖碧兒齋「賜封」咖啡男稱號而非好男人？陳豪一於「做畀你睇」，全程拿着咖啡杯滿場飛，更飲住咖啡「Chok甫」打保齡！

對於獲廖碧兒「賞賜」悶蛋「咖啡男」，陳豪滿不在乎地說：「我不嬲都係咁o架啦！」並直認雙方久未聯絡。對舊愛冷淡的他，隨即大讚「新歡」Aimee是好女仔：「佢人品好好！（佢讚你好男人喎！）我只係普通人啫！」談到廖碧兒早前在微博上載一張咖啡豆照片，並註明是好友相贈，令人聯想是陳豪重修舊好的「傑作」，陳豪即「羅Sir」上身猛擰頭：「我冇送呀！」隨即揚言已請Aimee飲咖啡：「拍《心戰》時喺12廠有請佢飲！」雖然他矢口否認請伊人回家歎咖啡，但卻直認正力追Aimee：「努力中！」問是否好難追？他即時笑到癲，並推搪不懂回答！對於「情敵」蕭正楠投降認輸，他傻笑說：「唔識答，好女仔梗多人追！」

微博否認把臂睇樓

另一邊廂，Aimee昨日出席海港城母親節活動時，獲大會安排一名小朋友扮「羅Sir」送上公仔，並着她轉贈陳豪媽媽，惟Aimee即時拒絕：「都未拍拖，未去到呢個階段！」大把貨的Aimee更「吊高嚟買」，強調拍拖會順其自然，父母亦不心急。此外，陳豪前晚在微博澄稱當日並沒「到訪」Aimee家中，亦不知伊人住址，澄清當日只是獨個兒睇樓，但又盛讚對方工作認真，認真弔詭！