任達華：唔好重蹈覆轍

莫少聰被拘留15日後獲釋，昨午在微博上報平安，不少圈中好友都替他高興，希望他能重新振作！

熊欣欣：「依家我喺杭州，有打過佢電話好多次，都未搵到，應該冇開機啩！呢段時期點會開機先！（同佢洗塵？）過兩日我返去先再約啦！我有喺佢微博留言，希望佢見字回電！」

張國強：「真係唔知佢出咗嚟，不過一定會打電話畀佢！今次件事一定對佢有得着，我哋作為旁觀者都幫唔到啲乜嘢，但係佢可以15日就出到嚟，證明佢冇外間想像中咁壞！至於孫興，我真係唔識佢，理都理我朋友先啦！」

任達華：「（獲釋）都好嘅！希望佢吸取一個大教訓，唔好再重蹈覆轍！每個人都有錯誤同失敗嘅時候，希望佢會重生，咁我都會支持佢嘅！（同佢聯絡？）可能佢都關咗機，或者去佢微博留言祝福佢啦！」

余安安於微博留言力撐：「Take very good care，ok？加油！」

鄭則士：「我依家喺橫店拍戲，唔知佢出咗嚟，仲未聯絡佢，等佢安頓先再搵佢！」