胡心諾胸懷大志三點出擊

出道已經逾三年的o靚模胡心諾（Rainbow），年僅十九歲，完成即將推出的第三本寫真就會「掛靴」，專心拍戲及進軍日本巿場。談及未來發展，她雄心勃勃，無他，雙十年華都未到的她長路漫漫，仲有大把世界！

若Angelababy是「o靚模始祖」，胡心諾（Rainbow）絕對稱得上是模第二代，眼見Baby已「升呢」為潮o靚模，不但攻日成功，電影更是一部接一部，成為現代o靚模神話，Rainbow直言視Baby為目標：「我一直都好鍾意佢，佢本寫真我都有買，其實佢十四、五歲就開始做Model，早過我出道，佢都努力咗好耐先去到呢個位！」

兼職私影模狂接Job

Rainbow最初為攝影會任「私影模」，以兼職形式充當模特兒，後來愈來愈受歡迎，高峰期試過一星期接四單Job：「每單大概有四位數字，每次影三個鐘，其實都幾好玩，有時會喺室內影，星期六、日就多數影外景。」她現時間中會跟攝影師在網上聯絡：「其實好多龍友都好好人，佢哋有時都會問候吓我，氹我開心！」她還經常搞粉絲聚會，互相分享近況。

三歲定八十，Rainbow自小鍾意影相：「細細個媽咪已經成日幫我影相，生日、去玩都會影好多！」她影過的相簡直是天文數字，連她自己都收藏得不齊全，有些攝影師影完會沖曬一份給她，故家中儲存了很多相簿！

作為「九十後」，她亦積極為未來打算，雖然會考成績未如理想，但她仍繼續讀書進修：「依家讀緊商科，讀一年就完，會繼續讀書，搵自己有興趣嘅嘢，例如學平面設計，學完可以自己整相。」她認為讀書跟工作可同時兼顧：「讀書唔會阻到做嘢，我揀嗰啲通常係畀在職人士讀，夜晚先返學，時間有彈性。」

怕長江後浪推前浪

o靚模輩出，Rainbow亦擔心長江後浪推前浪，惟有努力維持人氣，同公司經常冒出新o靚模，她認為可以擦出新火花：「我話就話係大師姐，其實年紀都差唔多，公司有新人係好事，市場都鍾意新嘢，畀粉絲有多啲選擇，有新鮮感，製造更多話題！」

其實她今年不想出寫真，不過公司建議所有o靚模一齊影一本，她亦無異議，影完可能會收山，轉攻其他市場，攻日一直是她的目標，其實無論內地、日本或台灣市場她都有興趣，但要等公司安排：「依家日本都好穩定，要去日本發展都唔驚，如果接到工作都會去，希望廿三歲前可達成。」

盼出書寫愛情小說

明年若有機會，她希望出書寫愛情小說：「我好鍾意寫嘢，學校作文都高分，依家諗緊幾個唔同類型嘅古仔，希望搵到個大家都適合睇。」至於曾客串《最強囍事》及《撲克王》的她，對演戲興趣愈來愈濃，今年想全力專注演藝事業。

後記：力保皮膚白淨

年紀輕輕的確是Rainbow的最大優點，而Keep住白滑肌膚更稱得上是她的終身使命！除了平日落妝後做好清潔，她亦會多食水果蔬菜：「盡量都唔會曬太陽，如果真係要去海灘，就會搽足防曬，就算平日行街，猛太陽都一定會擔遮！」可見美女為了靚樣，的確要下不少工夫！