Kelly有陰影追女慢慢嚟

樂壇天后陳慧琳小產後昨日首度復工，談到痛失孖女仍難掩傷感，她表示會盡力克制自己不要想太多，並對懷孕仍存有陰影，再生與否都要「睇定啲」！

現年38歲的陳慧琳（Kelly）早前接受人工受孕懷有孖女，可惜懷胎5個月，至3月初宣布意外流產，身心大受打擊！經過個多月休養後，Kelly昨日終於走出陰霾，與曾志偉及陳嘉桓等出席剪綵活動。身穿單肩貼身短裙、配襯一套價值440萬元藍寶石鑽飾的她，雖然未完全收身，有少許肚腩，但精神看來不錯，面上還常掛着笑容！向來貪靚的她堅持着4吋高踭鞋，落幾級樓梯都有4、5名工作人員扶實！

「唔提唔講都OK」

據知Kelly的康復情況理想，她亦自言已好得八八九九，但為怕子宮下垂，目前不可長期站立，亦不宜過分操勞：「我唔可以長期站立！之後拍廣告，廣告商都好就我，畀我坐低嚟拍！（老公有冇叫你停工？）冇喎！可能佢怕我喺屋企太多嘢講煩住佢！成日叫我去玩仔（囝囝劉昇）囉！」她表示心情已平復不少，但仍須盡量克制自己：「唔提唔講都OK，盡量唔畀自己諗番！」問到會否再努力造人？她坦言會視乎醫生指示、不會心急：「調理好先啦！（會唔會有陰影？）會㗎！會睇定啲先，唔好急！」稍後會睇中醫調理身體。

Kelly坦言幸得囝囝蝦餃仔相伴，令身心有所寄託：「囝囝氹番我？都係㗎！仲有好多人分散我注意力！蝦餃仔咁細個乜都唔知，好彩之前冇同佢講我有BB！佢好活躍，淨係知有車玩，無論玩具同真車都咁鍾意，佢試過喺停車場推真車，以為推得郁！」日前她發布了一輯與囝囝在沙灘玩樂的照片，不少人覺得蝦餃仔的長髮Look似女仔：「我覺得好型，所以唔捨得剪！不過之前實在太長，我趁住佢瞓覺時幫佢剪頭髮，可惜剪咗一邊佢就醒咗，搞到依家一邊長一邊短！」

昨日是英國威廉王子大婚之日，Kelly希望收看這場世紀婚禮有幾豪，昨晚記者聯絡Kelly，她讚嘆婚禮莊嚴：「最初見王子同王妃都好緊張，當佢哋拖住手，望住對方宣讀誓詞時，兩個人都展露微笑，令人感到好溫馨、甜蜜同幸福！」

子淇佗仔如釋重負

另一邊廂，徐子淇得償所願、將為李兆基（四叔）添男孫，有指她一直壓力很大！子淇父親徐傳順日前接受電視台訪問時承認，女兒懷男丁可說如釋重負：「開心！四叔鍾意仔，生個男孫會開心啲！對我嚟講冇分別，如果係仔，佢（子淇）都如釋重負，因為老爺希望有男孫，個心算係有啲交代！」主持人林映暉再問子淇之前是否有很大心理壓力？他說：「有㗎！有㗎！」並透露女兒的預產期為7月，但由於已有兩次生女經驗，所以今次特別輕鬆。