拉姑等霆鋒救火

狄波拉早前因謝霆鋒未有邀她慶祝榮升金像獎影帝而有微言，前日她在中環血拚時，明顯心情麻麻，一反常態避上鏡，原來與乖仔尚未負荊請罪有關。

謝霆鋒早前勇奪金像獎影帝寶座，可是只得父親謝賢和太太張栢芝共慶，未見媽媽狄波拉（拉姑）影蹤，其後拉姑解釋因她身在外地，不過也有埋怨囝囝沒有邀她出席，醋意十足。早前回港的拉姑，前日下午四時，打扮到「彩雀咁靚」在中環Shopping，見她在名店內揀黑超及絲巾，還要求店員拎其他顏色的絲巾供她選擇，可惜揀極都不合心水。

期間眼利的拉姑瞄到記者，她先愕一愕然，隨即縮到飾櫃後面避鏡頭，與以前「任影唔嬲」的大方態度截然不同，見傳媒繼續守候，她即致電老公鬍鬚Kong前來「救駕」，被急召的鬍鬚Kong速到，可是兩人仍留在店內半小時才閃走。

Chok樣令觀眾瘋狂

拉姑被問到可有跟霆鋒慶祝攞影帝？她答得大方得體：「佢好忙，但呢幾日會同佢見面。（霆鋒之前都同四哥食飯慶祝喎！你約定日子未呀？）佢會安排o架喇！」說罷即「摩打腳」上車走人。

同日，霆鋒在上海出席代言品牌的化妝品活動，大會安排他坐開篷車出場，雖然霆鋒只笑不語，但其Chok樣令全場觀眾瘋狂尖叫，更有幸運的女粉絲得到霆鋒的抱抱，當霆鋒離場時，全場人向霆鋒的座駕唱《因為愛所以愛》，可見他大受粉絲歡迎。