待產Ada大滿足叉腰抖抖

蔡少芬（Ada）將於下周分娩，心情緊張的她執定行李放於車中，以防愛女提前出世，但連日閉關養胎的她悶得發慌，前日孖老公張晉外出逛街食個不停及睇戲，紓緩產前緊張之餘，亦當作產前運動。

蔡少芬（Ada）臨盆在即，老公張晉近日完成內地工作後，已急返港陪老婆待產，夫婦二人對新生命降臨緊張又興奮。不過，連日來於家中閉關安胎的Ada悶到「身痕」，前日上午她借微博向老公撒嬌：「今日無論如何，我一定要飲珍珠奶茶。」廿四孝老公張晉當然聽命，約下午一時即驅車接老婆大人到元朗市中心，車上更見大篋行李，看來他們已做足準備執定「走佬袋」中所需用品，隨時往醫院產女。

穿上大肚連身裙，戴黑超的Ada雖然肚大如籮，但動作敏捷，下車後即急步往購買她最愛的珍珠奶茶，當發現記者時，向來友善的Ada更笑笑口打招呼，她一口氣啜了數啖奶茶後，一臉滿足。其後Ada繼續「掃街」，購買雞蛋仔醫肚，更邊行邊吃往銀行處理私務，逗留約十五分鐘上車與老公往九龍區的商場行街睇戲。

張晉與Ada到達商場後，十指緊扣周圍逛，二人在戲院外指手畫腳研究懸疑刺激電影《危機解密》，期間Ada還如連體嬰般，從後伏於老公肩上，恩愛非常。排隊購票時，挺着大肚的Ada明顯有倦意，不時叉腰，問她是否很累，她說：「依家個肚咁大，有時條腰都好攰。（下星期生得？）就快喇！我都執定入院啲嘢放喺車度，驚隨時生得，真係好緊張又興奮。但係呢幾日都留喺屋企真係好悶，所以特登同老公出嚟行街，當做吓產前運動嘛！」

胃口大開食不停

Ada透露臨盆在即胃口大增，時時刻刻吃不停：「其實之前已經食完早餐，跟住食埋雞蛋仔，但依家又好想食嘢。」