洪欣戥舊愛開心：都想佢好！
莫少聰涉毒案有新進展，有指他將於明日獲釋，其舊愛洪欣與好友均叫好。正在內地拍劇及電影的洪欣昨日表示，完全未有時間留意阿聰的涉毒案，但提到有指因他在拘留所內守規矩，有望在明日離開，她即戥對方開心：「其實我都冇時間睇新聞，有關佢（阿聰）嘅消息都係從記者口中得知咋！咁我當然希望佢盡快放番出嚟啦！雖然冇一齊，但我都想佢好嘅。（稍後聯絡？）唔會啦！亦唔想多評論，因為我都唔太了解件事！」
至於阿聰的好友張國強則說：「我問過張國忠（阿聰經理人），一直都等緊消息，都聽到係29號放人，梗係戥佢開心啦！（打算點幫佢？）其實件事唔一定咁負面，等到佢出嚟親自解釋就最好。」
另外，莫少聰演出的內地劇《光輝歲月》獲監製熊欣欣力撐，表示不會換角。昨日有指他將於明日「放監」，熊欣欣對此說：「我都收到消息，應該係！（去接佢？）等佢出嚟啦！唔接喇！（換角？）我哋兄弟情，角色預留咗畀佢！」
洪欣得知舊愛莫少聰有機會獲釋，亦替對方高興。（資料圖片）
張國強（右）希望莫少聰獲釋後，親自向外解釋事件。（資料圖片）